Ил Дархан Үөһээ Бүлүүгэ ойуур баһаарын умуруорууга аналлаах мунньах ыытта

Айсен Николаев бэс ыйын 14 күнүгэр Үөһээ Бүлүүгэ өрөспүүбүлүкэтээҕи ыксаллаах быһыыга-майгыга хамыыһыйа мунньаҕын ыытта.

Баһаар тахсара кутталаах кэм саҕаланыаҕыттан эрэгийиэн үрдүнэн 62 тыһыынчаттан тахса гектар иэннээх сиргэ уот турбутун туһунан баһылык иһитиннэрдэ. Ааспыт сылга бу көрдөрүү 95 тыһыынча гектарга тиийбитэ, ол эрэн, Ил Дархан этэринэн, ити уоскулаҥ сылтаҕа буолара сатаммат. Билигин Бүлүү бөлөх улуустарыгар олус уустук быһыы-майгы үөскээтэ. Улахан баһаардар бүгүн Ньурба уонна Үөһээ Бүлүү оройуоннарыгар умайа тураллар. Итилэри умуруорууга нэһилиэнньэни, олохтоох уонна эрэгийиэннээҕи уоту утары үлэлиир тэриллиилэри кытта  ЫБММ күүстэрэ кыттыыны ылаллар. Ону тэҥэ Саха сиригэр Авиалесоохрана уонна Рослесхоз үлэһиттэрэ быыстала суох үлэлии сылдьаллар.

Бары уоту утары үлэҕэ кыттыылаахтарга өрөспүүбүлүкэ аҕа баһылыга махталын биллэрдэ «Эһиги сыралаах үлэҕит-хамнаскыт уонна идэҕэ бэриниилээх сыһыаҥҥыт эрэ көмөтүнэн дьон олорор сирдэригэр быһаччы куттал үөскүүрүн таһаарбатыбыт», — диэтэ Айсен Николаев. Ил Дархан “хомойуох иһин, үгүс баһаар дьон дьалаҕайыттан, айылҕаҕа сэрэҕэ суохтан тахсарын” бэлиэтээн эттэ.

Айсен Николаев өрөспүүбүлүкэ олохтоохторун баһаар куттала суох буоларын туһугар бары быраабылалары тутуһан сылдьарга, сэрэхтээх буоларга ыҥырда. «Тыа — биһиги уопсай баайбыт, бу баайы аналлаах үлэһиттэр эрэ буолбакка, бары харыстыахтаахпыт. Манна биһиги хас биирдиибит тус эппиэтинэстээхтик сыһыаннаһара олус наадалаах», — диэн Саха сирин олохтоохторугар туһаайан Айсен Сергеевич санаатын үллэһиннэ.

Баһаарга былдьаммыт сирдэр иэннэрин ааҕыыга тахсыбыт сыыһалар туһунан Ил Дархан бу курдук быһаарыы биэрдэ:

— Хас да баһаар туһунан киирбит сыыппаралар Рослесхоз ылбыт дааннайдарыттан улахан арыттаах көрдөрүүлэр киирбиттэрэ. Бу олохтоох таһымҥа дьон сыыһатыттан тахсыбыт бутуур. Холобур Ньурбаттан киирбит көрдөрүүлэр 40 төгүл атын сыыпаралар киирбиттэр. Бары этиллибит түгэннэр көннөрүлүннүлэр. Экология министиэристибэтэ киирэр дааннайдары мантан ылата быыстала суох хонтуруоллур буолуоҕа,- диэтэ. Маны тэҥҥэ федеральнай уорганнартан киирбит ыйытыылар сэмэлээһин быһыытынан буолбакка, көмө күүһү суоттуурга анаммыт ыйытыылар буолаллар диэн быһааран биэрдэ.

Өрөспүүбүлүкэбит баһылыга Москваҕа командировкаҕа сылдьан Арассыыйа бырабыыталыстыбатын Бэрэссэдээтэлэ Михаил Мишустины кытары көрсөн кэпсэппитин туһунан кэпсээтэ. Бу кэпсэтии түмүгүнэн өрөспүүбүлүкэҕэ бырабыыталыстыба резервнэй пуондатыттан ойуур баһаарын умуруорууга эбии 350 мөл. солк. көрүллэр буолла, ону тэҥэ федеральнай резервэттэн эбии умуруорууга кыттар дьону ыытыллыахтара.

Мунньахха тыа хаһаайыстыбатынан дьарыктанар салаа үлэһиттэр уоту утары үлэҕэ мэһэйдиир доппуруостарга, докумуон былдьааһыннарыгар үҥсүүлэрин көрүү буолла. Ил Дархан: «Бу ыйытыыны мин генеральнай борокуруор солбуйааччыта Дмитрий Викторович Демешинныын кэпсэппитим. Төһө кыалларынан баһаар кэмигэр доппуруос, докумуон үлэтин кыччатар туһунан кини эмиэ сөбүлэстэ. Бары ыйытыылары уот умуруорар үлэлэр түмүктэммиттэрин кэннэ быһаарыахпыт”.

Айсен Николаев мунньахха экология уонна айылҕа харыстабылын миниистирэ Сахамин Афанасьев өрөспүүбүлүкэ бырабыыталыстыбатын резервнэй фондатыттан ойуур баһаарын умуруорууга эбии 50 мөл. солкуобай туһаныы туһунан этиитин өйөөтө. Ону тэҥэ Саха сирин Ил Дархана уустук быһыы-майгы уҕарыы илигинэн сибээстээн өрөспүүбүлүкэҕэ Бе-200 сөмөлүөт үлэтин болдьоҕун уһатар туһунан сайаапканы ыытарга дьаһайда.

«Саха сирэ» хаһыат, edersaas.ru

Хаартыска sakha.gov.ru