Бу күннэргэ Ил Дархан Айсен Николаев быйыл үөрэхтэрин бүтэрэн улуустарга үлэлии бараары сылдьар эдэр исписэлиистэри кытта видеосибээс нөҥүө кэпсэттэ.
edersaas.ru
Быйыл 3200 ыччат үөрэҕин бүтэрдэ. Өрөспүүбүлүкэ Аҕа баһылыга ыччаттары долгутар ыйытыыларга хоруйдаата. Эдэр исписэлиистэр бэйэлэрин санааларын үллэһиннилэр. ХИФУ быйыл бүтэрбит Денис Томскай Бүлүү улууһун Чочу орто оскуолатыгар информатикаҕа үөрэтиэҕэ.
СӨ Бырабыыталыстыбатын пресс-сулууспата иһитиннэрбитинэн, бүгүҥҥү күҥҥэ өрөспүүбүлүкэ үрдүк үөрэҕин кыһаларыгар — 24 000, күнүскү үөрэххэ — 16 000 устудьуон үөрэнэр.
Эдэр исписэлиистэр үгүстэрэ төрөөбүт улуустарыгар төннүөхтэрэ, сорохтор тус сыаллаах бырагырааманан ыраах улуустар кытыы нэһилиэктэригэр үлэлии тиийиэхтэрэ.
Ил Дархан эдэр исписэлиистэргэ төрөөбүт дойдулара — Саха сирэ социальнай-экэнэмиичэскэй сайдыытыгар кылааттарын киллэрэр ыра санаалара туоларыгар баҕарда уонна ыччаттарга махтанан туран, кэс тылын тиэртэ.
Елена ПОТОЦКАЯ, «Cаха сирэ» хаһыат, edersaas.ru
Хаартыска: СӨ Бырабыыталыстыбатын саайтыттан