Наука күнүн көрсө Ил Дархан Егор Борисов Москваҕа үөрэнэр аспираннары кытары кэпсэттэ.
“Көрсүһүүгэ медицина, тыа хаһаайыстыбатын эйгэтин, техническэй, юридическай наука аспираннара кыттыыны ыллылар. Олус интэриэһинэй кэпсэтии буолла. Кинилэр холобурдарынан да ылан көрдөххө, биһиги эдэр учуонайдарбыт саҥа, сонун көрүүлээхтэрин таһынан, төрөөбүт дойдуларын сайыннарар баҕалара улахан”, — диэн бэлиэтиир Егор Борисов Инстаграмҥа баар аккаунугар.
Көрсүһүү түмүгэр Ил Дархан Москваҕа Саха сирин бэрэстэбиитэлистибэтигэр киин үрдүк үөрэх кыһаларын выпускниктарын ыстаабын тэрийэргэ эттэ. “Киин регионнар үрдүк үөрэхтэрин выпускниктарын уонна манна үлэлии сылдьар, биһиги өрөспүүбүлүкэбит интэриэһин көмүскүүр, Саха сиригэр көһөн үлэлиэн баҕалаах эдэр талааннаах үлэһиттэр ыстааптарын тэрийиэҕиҥ. Онуоха олук баар, хас биирдии эдэр киһини кытары туспа кэпсэтиэххэ наада”, — диэн бэлиэтиир кини.
Аграфена КУЗЬМИНА, “Саха сирэ” хаһыат, edersaas.ru