Ил Дархан дуобакка аан дойду чөмпүйүөнүн Матрена Ноговицынаны эҕэрдэлээтэ
Дуобат «хонуутун» эҥкилэ суох баһылаабыт Матрена Ноговицына кыайыытын Саха сирэ уруйдуу-айхаллыы көрсүбүтэ. Бары үөрбүппүт. Кини саха норуотуттан дуобакка аан дойду бастакы чөмпүйүөнэ буолар.
Бүгүн Ил Дархан Айсен Николаев «Биир ньыгыл Арассыыйа» баартыйа уопсастыбаннай приемнайыгар Матрена Ноговицыналыын, тириэньэрэ Николай Кычкинныын уонна ийэтэ Мария Николаевналыын көрүстэ.
Ил Дархан Саха сирин ытык-мааны олохтоохторун ааттарыттан Матренаны, Николай Кычкины бу үрдүк таһымнаах ситиһиилэринэн ис-сүрэҕиттэн эҕэрдэлээтэ. Ааспыт күрэхтэһии, Матрена инники өттүгэр туох былааннардааҕын уонна өрөспүүбүлүкэҕэ дуобат сайдыытын тустарынан ирэ-хоро кэпсэттилэр. Ил Дархан өрөспүүбүкэбитигэр спортсменнары өйүүргэ сөптөөх үлэ барыахтааҕын ыйда.
Матрена тапталлаах ийэтэ Мария Николаевна үгүс төрөппүт курдук күрэхтэһии кэмигэр олус долгуйбутун, бу сырыыга хайаан да кыайыы үктэллээх кэлиэҕэ диэн санаабыта туолбутун туһунан олус иһирэхтик кэпсээтэ.
Ил Дархан Айсен Николаев Матренаҕа «СӨ физическэй култууратын уонна успуордун үтүөлээх үлэһитэ” үрдүк ааты уонна 500 тыһ. солк. бириэмийэни, оттон тириэньэр Николай Николаевичка “Гражданскай килбиэн” анал бэлиэни кытта 250 тыһ.солк. бириэмэйэни үөрүүлээх быһыыга-майгыта туттартаата.
Түгэнинэн туһанан, РИИХ «Сахамедиа» АУо кэлэктиибэ Матренаҕа, Николай Николаевичка бу үрдүк кыайыыларынан, ситиһиилэринэн итии-истиҥ эҕэрдэтин тиэрдэр.