Маны аах Нацбырайыактар

Ил Дархан доруобуйа саҥа миниистиригэр коронавируһунан ыалдьыыны намыратарга соруйда

Бэҕэһээ, алтынньы 23 күнүгэр, Ил Дархан Айсен Николаев СӨ Доруобуйа харыстабылыгар миниистирин э.т. Лена Афанасьеваны кытта көрүстэ. Көрсүһүүгэ дьаҥ тарҕаныытын, доруобуйа харыстабылын систиэмэтин суһал соруктарын туһунан кэпсэттилэр. Миниистир эбээһинэһин толорооччуга гражданнар коронавируһунан ыалдьыыларын намыратар сорук туруорулунна.

«Айсен Сергеевич дьаҥ балаһыанньатыттан, дьон коронавирустан өлөллөрүттэн долгуйар. Соруктары туруорда, онон үлэлиэхпит», — диэн көрсүһүү кэнниттэн Лена Афанасьева санаатын үллэһиннэ.

«Саха сирин бары миэдиктэрэ дьаҥы бохсуу, хааччахтан босхолонуу иһин үлэлиибит. Түгэнинэн туһанан, бар дьону баһыыны ыларга ыҥырабын. Бүгүҥҥү күҥҥэ доруобуйаны харыстыырга, уопсай балаһыанньаны тупсарарга бу саамай көдьүүстээх ньыма буолар», — диэн миниистир э.т. бэлиэтээн этэр.

Көрсүһүү кэмигэр онкодиспансер уонна кардиодиспансер тутуулара болдьоҕор баран иһэрин, «Доруобуйа харыстабыла» нацбырайыак олоххо киириитин, уопсастыбаннай доруобуйаны бөҕөргөтүү, доруобуйа харыстабылын систиэмэтин сайыннарыы туһунан Ил Дархан ыйааҕын тула кэпсэтии таҕыста.

Ил Дархан уонна Бырабыыталыстыба дьаһалтатын пресс-сулууспата.

Андрей Сорокин хаартыската.

0
0