Бэлиитикэ Сүрүн Экэниэмикэ

Кэтэх дьиэни туттааччыларга чэпчэтиилээх кирэдьиити биэрэр пилотнай бырайыак үлэлиэ

Ил Дархан Айсен Николаев СӨ Бырабыыталыстыбатыгар бэдэрээттэһэр тэрилтэлэри кытта дуогабардары түһэрсибэккэ, чааһынай дьиэлэри тутууга кирэдьииттээһини пилотнай бырайыак быһыытынан олоххо киллэриигэ үлэни саҕалыырга сорудахтаата. Сорудах бэс ыйын 7 күнүгэр өрөспүүбүлүкэ Бырабыыталыстыбатын уонна СӨ баһылыгын дьаһалтатын былааннаах сүбэ мунньаҕын кэмигэр этилиннэ.

«Тыа сиригэр дьиэни бэдэрээччитэ суох, бэйэ кыаҕынан тутуу тарҕаммыт үгэс, онон бу бырагыраама биһиги өрөспүүбүлүкэбитигэр бэрт туһалаах буолуон сөп. Муниципальнай тэриллиилэри кытта бииргэ үлэлэһэн, бырайыагы олоххо киллэрэн дьоҥҥо көмө буолуох тустаахпыт. Бырайыак олоххо киирдэҕинэ, тыа сиригэр олорор дьон 6 мөл. солк. тиийэр үбү 9 %-наах  кирэдьиит быһыытынан ылыахтарын сөп», — диэтэ Айсен Николаев.

Ону таһынан сааҥсыйалар дьайыыларын кэмигэр нэһилиэнньэни өйүүргэ анаммыт федеральнай таһымҥа ылыллыбыт быһаарыылары хонтуруоллуурга үлэ ыытар туһунан дьаһал биэрдэ. Ол курдук, Айсен Николаев чэпчэтиилээх кирэдьииттээһини кэтээн көрөргө аналлаах биир кэлим информационнай ситими үлэҕэ киллэриигэ ураты болҕомтону уурарга ыҥырда. «Бу систиэмэни олоххо киллэрии информацияны кытта үлэ болдьоҕун кылгатыаҕа уонна тута бигэргэтэргэ көмө буолуо», — диэн быһааран эттэ.

Ил Дархан научнай чинчийиилэри салайыы боппуруоһугар болҕомтону научнай-чинчийэр, технологическай үлэлэри учуоттуур биир кэлим судаарыстыбаннай информационнай ситими кэҥэтиигэ туһаайда. «Систиэмэ үлэлэри учуоттуурга эрэ буолбакка, сөптөөх кэтээн көрүүнү ыытарга, чинчийиилэри былаанныырга уонна салайарга, ону сэргэ научнай чинчийиилэргэ бүддьүөт үбүн туһаныы сыалын-соругун сыаналыырга көмөлөһүөҕэ. Саҥардыллыбыт систиэмэ сүрүн кыттааччытынан Арассыыйа Наукаларын академията буолуоҕа», — диэтэ Ил Дархан уонна РАН-ы кытта ыкса үлэлииргэ кэккэ сорудахтары биэрдэ.

Салгыы баһылык “ВУЗ онлайн » сервиһи кэҥэтиигэ тохтоон ааста. Урут маннык өҥөнөн бүддьүөт миэстэтигэр киирбит абитуриеннар эрэ туһанар кыахтаах эбит буоллахтарына, быйылгыттан төлөбүрдээх үөрэххэ киирээччилэр, ону тэҥэ тус сыаллаах уонна чэпчэтиилээх миэстэлэргэ киирбиттэр туһаныахтарын сөп. Бу хас даҕаны үөрэх кыһатыгар туттарсар оҕолорго олус көдьүүстээх буолуоҕа. 

1
0
Telegram @edersaas20