Ил Дархан Дьаһалтаҕа уонна Бырабыыталыстыбаҕа саҥа анааһыннарынан санаатын үллэһиннэ
Саха сирин Дьаһалтатыгар уонна Бырабыыталыстыбатыгар каадырдары уларытыылар Айсен Николаев Ил Түмэн дьокутааттарыгар Анал этиитинэн туруорбут саҥа соруктарын кытта сибээстээхтэр. Бу туһунан эрэгийиэн баһылыга Саха-СТРХ быһа эпиир кэмигэр иһитиннэрдэ.
“Федеральнай министиэристибэлэргэ сөбүлэҥи ааспыттарын кэннэ доруобуйа харыстабылын миниистиринэн Лена Николаевна Афанасьеваны, үөрэх уонна наука миниистиринэн Ирина Павловна Любимованы, ону тэҥэ, СӨ экологияҕа, айылҕаны туһаныыга уонна ойуур хаһаайыстыбатыгар миниистирин эбээһинэһин толорооччунан Евгений Андеевич Перфильевы анаатым”, — диэн Айсен Николаев эттэ.
Баһылык, СӨ экологияҕа, айылҕаны туһаныыга уонна ойуур хаһаайыстыбатыгар миниистирин эбээһинэһин толорооччуну үгүстэр истибэтэх ааттара, ол эрээри, Евгений Перфильев олоҕун тухары гидрометеорологияҕа уонна тулалыыр эйгэни кэтээн көрөр систиэмэҕэ, “Дьокуускай” холбоһуктаах гидрометеорологическай ыстаансыйаҕа үлэлээбитэ, кэлиҥҥи кэмҥэ Ил Түмэн хонтуруоллуур кэмитиэтин салайбыта диэн бэлиэтиир.
“Бу олус чиэһинэй, кытаанах, киэҥ билиилээх, айылҕа харыстабылын сокуонун кэһээччилэр суолларын хааччахтыырга уонна баһаары утары охсуһууну тэрийэргэ сөптөөх киһи” – диэн Саха Сирин баһылыга бэлиэтээтэ.
Маны тэҥэ, баһылык СӨ Ил Дарханын уонна Бырабыыталыстыбатын дьаһалтатын салайааччынан Георгий Михайловы анаата.
СӨ Ил Дарханын уонна СӨ Бырабыыталыстыбатын пресс-сулууспата.