Муус устар 25 күнүгэр Саха сирин Ил Дархана Айсен Николаев өрөспүүбүлүкэ Бырабыыталыстыбатын уонна СӨ баһылыгын дьаһалтатын уонна Бырабыыталыстыба салалталарын кытта мунньаҕы ыытта.
Ил Дархан муус устар 28 күнүгэр ыытыллыахтаах Ил Түмэн пленарнай мунньаҕар бэлэмнэргэ сорудахтаата. Ити мунньахха өрөспүүбүлүкэ бүддьүөтүгэр уларытыылары көрүөхтэрэ, ону тэҥэ административнай адаҕалааһыннары утары сокуона барыла, тутуу үлэтин процедураларын аҕыйатыы боппуруостара көрүллүөхтэрэ.
Айсен Николаев ылыллар федеральнай быһаарыылар туолууларын хонтуруоллуурга дьаһайда. Бэрт сотору кэминэн федеральнай таһымҥа кэккэ суолталаах быһаарыныылар ылыныллыахтара. РФ Бырабыытылыстыбата салгынынан тиэйээччилэри өйүүр саҥа инструмены үлэҕэ киллэриэхтээх. Дойду иһигэр көтүүлэри тэрийиигэ компенсация көрүллүөҕэ. Бу сыалга 100 млрд солк. былааннаммыт. Ил Дархан бастакы вице-премьер Дмитрий Садовниковка бу үлэҕэ көхтөөхтүк кыттан «Якутия» авиа хампаанньа үп-харчы өттүнэн өйөбүлү төһө кыалларынан түргэнник ыларын ситиһэри сорудахтаата.
Уһук Илини өйөөһүн чэрчитинэн ТОР-дар олоххо киллэрэр инвестиционнай бырайыактарыгар салаллар үп бырыһыанын субсидиялыырга быһаарыы ылылынна. Онно 8 млрд солк. көрүллүбүт.
Мунньах кэмигэр Айсен Николаев тутуу матырыйаалларын ырыынакка киллэриини лаппа судургутуппуттарын туһунан иһитиннэрдэ. Ол курдук Арассыыйаҕа оҥоһуллубут тутуу матырыйаалын бигэргэтии болдьоҕо 10 хонукка диэри кыччатыллыбыт. Атын дойдуттан киирэр тутуу матырыйаал хаачыстыбатын бигэргэтиигэ тас дойдуга ыытыллыбыт тургутуу түмүктэрин учуоттуур көҥүллэммит. Ону тэҥэ бары бигэргэтиини ааспыт тутуу матырыйааллара туһаныллар болдьохторо икки сылга уһатыллыбыт.
«Саха сирэ» хаһыат, edersaas.ru
Хаартыска СИА, Андрей Сорокин