Ил Дархан Айсен Николаев бүгүн СӨ бырабыыталыстыбатын кытары социальнай эбийиэктэр тутууларыгар, бырамыысыланнас эйгэтигэр үлэлиир тэрилтэлэр үлэ усулуобуйатын тутуһууларыгар, балыыһаларга сөптөөх эмп-томп кэлиитигэр, Дьокуускай куорат сайдыытыгар, о.д.а. боппуруостарга мунньах ыытта.
Ил Дархан Уһук Илин эрэгийиэннэрин куораттарын саҥардыыга туһуламмыт бырагымаама чэрчитинэн Дьокуускай куорат маастар-былаанын оҥорууга бырабыыталыстыба болҕомтотун хатаата. Кини бэлиэтииринэн, саҥа оҥоһуллар былаан өрөспүүбүлүкэбит киин куоратын тирээн турар кыһалҕаларын быһаарыыга уонна инники сайдыытыгар төһүү буолуохтаах.
– Бу бырайыак Дьокуускай куорат уопсай сайдыытын эрэ буолбакка, туох баар социальнай-экономическай сайдыытын, тас көстүүтүн барытын көрүөхтээх. Киин куораппыт дьон-сэргэ олороругар бары өттүнэн табыгастаах буолуохтаах. Уонна саамай сүрүнэ бу уларыйыыны куорат хас биирдии олохтооҕо бэйэтинэн билиэхтээх, киниэхэ ити сайдыы тиийиэхтээх, – диэн иһитиннэрэр Айсен Сергеевич мунньах кэмигэр.
Санатан эттэххэ, сэтинньигэ Ил Дархан Айсен Николаев Дьокуускай куорат маастар-былаанын оҥорууга бүтүн Арассыыйатааҕы куонкурус биллэрбитэ. Бу куонкуруска куораты былааннааһыҥҥа үлэлэһэр Арассыыйа ханнык баҕарар хампаанньата кыттыан сөп. Кыайбыт хампаанньа Дьокуускай куораты тупсаран оҥорууга үлэлэһиэҕэ.
Аграфена КУЗЬМИНА