Айылҕа харыстабыла Маны аах

Ил Дархан: “Былырыыҥҥытааҕар баһаар аҕыйах, ол эрээри, уоскуйар эрдэ”

СӨ Ил Дархана Айсен Николаев “САХА” ГТРК ханаалыгар “Айсен Николаевтыын быһа кэпсэтии” биэриигэ тахсан нэһилиэнньэн долгутар кэккэ ыйытыыларга хоруйдаата. Баһаар туһунан тугу иһитиннэрдэ?

“Быйылгы сылы былырыыҥҥыны кытта тэҥниир табыллыбат. Бүгүҥҥү да сыыппараларынан ылан көрдөххө, Саха сиригэр билигин 80 баһаар баар эбит буоллаҕына, былырыын бу кэмҥэ 144 этэ. 95 тыһ. гектар сиргэ өрт турар эбит буоллаҕына, былырыын, сыыспат буоллахпына, 1 мөл. 400 гектарга этэ.

Бу федеральнай да, өрөспүүбүлүкэтээҕи уорганнар да баһырхай үлэлэрин, ыксаллаах быһыыга-майгыга түргэнник хамсанар муниципальнай систиэмэлэр үлэһит илиилэрин ахсаана эбиллиитин, саҥа тиэхиньикэни атыылаһыы түмүгэр ситиһилиннэ. Ол иһигэр ыам, от ыйдарыгар ардаҕы искусственнайдык ыҥырыыны туһаныы көмөтө улахан.

Биллэн турар, билигин даҕаны уоскуйар эрдэ. Ыксаллаах быһыы-майгы мунньаҕын ыыппытым, кыра хаалла, кыайдыбыт, былырыыҥҥытааҕар чахчы ордук диэн уоскуйа быһыытыйбыт сорох салайааччылары кириитикэлээбитим. Айылҕа бырастыы гыммат. Кэккэ улуустарга халлаан куйаас турар. Оннооҕор Дьокуускайга 30-тан тахса кыраадыс сылаас. Сорох улуустарга бу нэдиэлэҕэ 37 тиийиэхтээх. Атырдьах ыйын бастакы күннэригэр диэри маннык туруохтаах”, — диэн Ил Дархан иһитиннэрдэ.

Күнү-дьылы кэтээн көрөөччүлэр чопчулуулларынан, атырдьах ыйын 4-5 күннэриттэн  эрэ сыыйа сөрүүтүйүөҕүн эттэ. Билигин даҕаны сорох улуустарга баһаар үрдүк – 5-с кылаастааҕын, элбэх улууска 4-с кылаас турарын санатта. Итиэннэ баһаар ахсаанын 60 бырыһыанын бастакы икки сууккаҕа умуруоралларын ыйда. Салгыы даҕаны өрт уотун умуруоруу бу курдук тэтимнээх буолуон баҕарарын, күн бүтүүтэ БЕ 200 сөмөлүөтү Саха сиригэр аҕалыахтарын эттэ. Балар Уус Майа улууһугар баар баһаардары умуруорууга туһаныахтара уонна Хабаровскай кыраай хоту өттүгэр үлэлиэхтэрин сөп эбит.

 

“Саха сирэ” хаһыат, edersaas.ru

 

 

0
0
Telegram Whatsapp