Доруобуйа Маны аах

Ил Дархан быһыыны биэрии тэтимин түргэтэтэргэ ыҥырда

Айсен Николаев улуустар баһылыктарын быһыыны биэрии тэтимин түргэтэтэргэ ыҥырда.

Өрөспүүбүлүкэҕэ коронавируһу утары быһыыны оҥоруу тэтимин уонна хааччахтыыр миэрэлэри тутуһууга хонтуруолу күүһүрдүөхтэрэ. Маны сэргэ, кирииби утары быһыы хампаанньатыгар улахан үлэ ыытыллыа.
Ил Дархан Айсен Николаев маннык соруктары улуустар уонна куорат баһылыктарын кытары суһал ыстаап уочараттаах мунньаҕар туруорда.
Эпидемиологическай балаһыанньаны Николаев уустук диэтэ. Ордук уустук быһыы-майгы Дьокуускайга, Мииринэйгэ, Нерюнгригэ, Ленскэйгэ, Сунтаарга, Мэҥэ Хаҥаласка, Намҥа бэлиэтэнэр.
Ил Дархан улуустар баһылыктарыгар быһыыны туруоруу уонна ол тэтимин күүһүрдүү сүрүн сорук буоларын тоһоҕолоото.
«Саамай сүрүн — дьон олоҕо. Быһыы тэтимэ бытааныттан, кинилэргэ куттал үөскүүр. Дьон олоҕунан оонньоомоҥ. Быһыыны ыларга туох да уустук суох буоларын курдук, бары усулуобуйа тэриллэн турар. 363 тыһыынча киһи номнуо толору вакцинацияланна. Ол да буоллар былааннаммыт көрдөрүүттэн ыраахпыт. Вакцина барытыгар тиийэр, онон тэтими күүһүрдэргэ көрдөһөбүн», — диэтэ өрөспүүбүлүкэ салайааччыта.
Быһыыны туруоруу сүүс бырыһыан Халыма оройуоннарыгар, Муомаҕа, Эдьигээҥҥэ, Аллайыахаҕа ситиһиллибит. Бу оройуоннарга коронавируһунан ыалдьааччы ахсаана аҕыйах.
Айсен Николаев хааччахтыыр миэрэлэри тутуһууну бастайааннай хонтуруолга тутарга соруйда. Ол иһигэр, саҥа ыйаах толоруллуутун хааччыйарга, аһыыр сирдэргэ, култуура уонна успуорт эбийиэктэригэр киирэргэ ыйыллыбыт ирдэбили булгуччу тутуһарга уонна ирдииргэ этилиннэ.
Маны сэргэ, кини кирииби утары быһыыны кэмигэр оҥорууну хааччыйарга уонна бастакынан, алын сүһүөх кылаас оҕолоругар, аҕа саастаах көлүөнэҕэ, дьарҕарбыт ыарыылаахтарга быһыыны туруорарга ыҥырда.
Сүрүн санитарнай быраас Маргарита Игнатьева иһитиннэрбитинэн, уопсайынан Саха сирин үрдүнэн кирииптэн быһыыны оҕолорго 17,2% , улахан дьоҥҥо — 9,5% ылбыттар. Үлэ Эдьигээҥҥэ, Аллараа Халымаҕа, Өлөөҥҥө, Уус Маайаҕа арыый мөлтөхтүк ыытыллар. Оттон Анаабыр уонна Аллайыаха оройуоннарыгар биир да оҕо быһыыны ыла илик. Улахан дьоҥҥо, кирииптэн быһыыны туруорууга Амма, Бүлүү, Ньурба, Мииринэй, Нам, Уус Маайа, Усуйаана оройуоннара хаалан иһэллэр.
Кини кириип вируһа билиҥҥитэ Саха сиригэр суоҕун, ол гынан баран, атын вирустар баалларын, ол иһигэр парагрипп уонна риновирустар баалларын эттэ. ОРВИнан ыалдьыы 17 улууска уонна Дьокуускайга бэлиэтэнэр.
Мария Васильева (СИА) хаартыскаҕа түһэриитэ.
0
0