Ил Дархан Айсен Николаев балаҕан ыйын 8-9 күннэригэр Мииринэй улууһугар үлэлиэҕэ. Бу туһунан кини пресс-сэкирэтээрэ Афанасий Ноев иһитиннэрэр.
Балаҕан ыйын 8 күнүгэр, Айсен Николаев «Аэропорты Севера» федеральнай тэрилтэ филиалын «Полярный» аэропордугар тутуу туругун көрбүтэ. Балаҕан ыйын 9 күнүгэр, Удачнайга Айсен Николаев сибэтиэй Серафим Саровскай аатынан таҥара дьиэтигэр ыалдьыттыаҕа.
Ол кэнниттэн Ил Дархан Дорожнай бөһүөлэккэ тиийиэҕэ. Айхалга АЛРОСА “Заря” кэмбинээтигэр сылдьыаҕа, саахалланар туруктаах дьиэлэр хаһаайыттарын кытта көрсүөҕэ уонна “2019-2025 сылларга хаарбах дьиэттэн көһөрүү” өрөспүүбүлүкэтээҕи аадырыстаах бырагырааманы олоххо киллэрии хаамыытын билсиэҕэ. «Айхал» рудник бастакы дириэктэрэ Георгий Кадзов пааматынньыгар сибэкки дьөрбөтүн ууруоҕа. Ол кэнниттэн «Северное сияние» култуура дьиэтигэр олохтоохтору кытта көрсүөҕэ.
Күн иккис аҥарыгар Саха сирин Ил Дархана Удачнай куорат киин болуоссатын тупсарыыга үлэ хаамыытын бэрэбиэркэлиэҕэ, маҥнайгы геологтар уонна Лариса Попугаева мемориалларыгар сибэкки дьөрбөтүн ууруоҕа. Салгыы Надежнай бөһүөлэккэ саахалланар туруктаах дьиэлэри кэрийиэҕэ, уонна Удачнай куорат уопсастыбыннаһын кытта көрсүһүүнү ыытыаҕа.
«Саха сирэ» хаһыат, edersaas.ru
Хаартыска sakha.gov.ru