Маны аах Уопсастыба

Ил Дархан биэрэпискэ кытынна

Айсен Николаев Бүтүн Арассыыйатааҕы биэрэпискэ “Госуслуги” портал нөҥүө кытынна.

Быйылгы биэрэпис 33 боппуруостаах, нэһилиэнньэ социальнай-демографическай балаһыанньатын, олорор усулуобуйатын билэр сыаллаах.

Биэрэпис түмүгэ стратегическай быһаарыныылары, өрөспүүбүлүкэ демографическай, экэнэмиичэскэй, социальнай бырагыраамаларын ылынарга, былаанныырга, суоллары, уопсастыбаннай тырааныспары, уот, сибээс, гаас лиинийэлэрин, оскуолалары, оҕо саадтарын, о.д.а. тутууга суолталаах буолуоҕа.

Бу биэрэпис өрөспүүбүлүкэҕэ ааспыт 10 сыл туох уларыйыылар буолбуттарын көрдөрүөҕэ. Ону таһынан, кэлэр 10 сылга судаарыстыбаннай бэлиитикэ хаамыытын торумнуоҕа. Онон хас биирдии киһи биэрэпискэ кыттара улахан суолталаах, — диэн Ил Дархан эттэ.

Айсен Николаев бэйэтин холобурунан, “Инстаграм” сирэйигэр онлайн көрүҥүнэн биэрэпискэ хайдах кыттары көрдөрдө. Онно көстүбүтүнэн, биэрэпис лиистэрин толоруу уустуга суох, 23 мүнүүтэ барбыт. Биир киһи дьиэ кэргэнин чилиэннэригэр барыларыгар толоруон сөп.

Ону тэҥэ, төрөөбүт тылынан эмиэ толоруохха сөп. 10 тылтан (саха, башкир, татаар, бүрээт, тува, чуваш, узбек, кытай, кэриэй, английскай) талан ылаҕын. Дьэ, төрөөбүт тылынан, сахалыы толорор эмиэ олус табыгастаах эбит!

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

1
0
Telegram @edersaas20