СӨ Ил Дархана Национальнай бибилэтиэкэ үлэ саҥа көрүҥүн киллэрэр туһунан бырайыагын өйөөтө.
2025 сылга СӨ Национальнай бибилэтиэкэтэ 100 сылын бэлиэтиэҕэ. Бу даатаҕа өрөспүүбүлүкэ бибилэтиэкэлэрин түмсүүлэрэ саҥа интэриэһинэй бырайыактардаах, саҥардыллыбыт материальнай-тэхиньиичэскэй баазалаах итиэннэ ааҕааччылар айар дьоҕурдара сайдарыгар, билиилэрэ-көрүүлэрэ кэҥииригэр көмөлөһөр, тирэх буолар кыахтаах буолуохтаахтар.
Саха сиригэр бибилэтиэкэ үлэтин сайыннарарга туһуламмыт саҥа көрүҥү киллэриини кытары сибээстээх боппуруостары уонна бырайыактары тохсунньу 25 күнүгэр СӨ Ил Дархана Айсен Николаев көрдө.
«Саҥа кэмҥэ бибилэтиэкэлэргэ киһи кинигэни ааҕарыгар усулуобуйаны сэргэ, манна дьону култуураҕа сирдиир, билиини-көрүүнү биэрэр, үөрэтэр, сырдатыы оҥорор ураты уопсастыбаннай эйгэ тэриллиэхтээх. Манна туһулаан өрөспүүбүлүкэ Национальнай бибилэтиэкэтин кэлэктиибэ иһитиннэрэр-биллэрэр үлэни сыыппараҕа киллэриигэ, өрөспүүбүлүкэ баай култуурунай нэһилиэстибэтин харыстаан кэлэр кэнчээри ыччакка тиэрдэргэ улахан үлэни ыытар«, — диэн этэр Айсен Николаев.
Саха сирин Национальнай бибилэтиэкэтэ Арассыыйа Хотугулуу-Илин бөдөҥ бибилэтиэкэлэриттэн биирдэстэринэн буоларын сэргэ, Уһук Илиҥҥэ модельнай бибилэтиэкэлэр тэриллиилэринэн, «Култуура» национальнай бырайыак иитинэн федеральнай бүддьүөттэн үбү көрдөрүүтүнэн инники кэккэҕэ сылдьар. Быйыл Саха сирин бибилэтиэкэлэрин 2030 сылга диэри үлэлэрин-хамнастарын сайыннарыы Стратегиятын оҥоруу уонна бигэргэтии былааннанар. Хас биирдии докумуон баар буолуута өрөспүүбүлүкэҕэ бибилэтиэкэлэр сайдалларыгар, саҥа бырайыактары көҕүлүүргэ төһүүнэн буолуохтара.
Национальнай бибилэтиэкэ өрөспүүбүлүкэ норуоттарын култуурунай нэһилиэстибэлэрин баай пуондаларын сыыппараҕа көһөрүүгэ уонна каталокка киллэриигэ улахан үлэни ыытар. Билигин бибилэтиэкэ пуондатыгар 1 мөл 700 тыһ. тахса бэчээттэнэн тахсыбыт изданиелар хараллан сыталлар. Саха сирин Национальнай бибилэтиэкэтэ биир сиргэ турбат. Аныгы үйэ тэтимин кытары тэҥҥэ хардыылыыр. Араас саҥа, сонун сүүрээннэри, бырайыактары олоххо киллэрэргэ, ол иһигэр оҕо ааҕыытын аныгы киинин, креативнай индустрия оскуолаларын тэрийиигэ, үүнэр көлүөнэ пааркатын тутууну олоххо киллэриигэ кыттар. Манна барытыгар өрөспүүбүлүкэ сүрүн бибилэтиэкэтэ резиденинэн буолуоҕа.
Национальнай бибилэтиэкэ салалтата билиһиннэрбит хас да бырайыагын Ил Дархан Айсен Николаев өйөөтө уонна бырабыыталыстыбаҕа өрөспүүбүлүкэ өртүттэн наадалаах өйөбүлү оҥорорго ымпыктаан-чымпыктаан үлэлэһэллэригэр соруйда.
Хаартыскаларга Мария Васильева (СИА) түһэриитэ