Маны аах Сүрүн

Ил Дархан бэтэрээннэргэ улахан болҕомтону уурарга соруйда

СӨ Ил Дархана Айсен Николаев  улуустар уонна куорат уокуруктарын баһылыктарыгар бэтэрээннэри харыстыырга, кинилэргэ улахан болҕомтону ууралларыгар соруйда.

Маай бырааһынньыктара Саха сирин бары нэһилиэнньэлээх пууннарыгар дистанционнай киэбинэн ыытыллаллар. Муниципалитеттар баһылыктара дьон тоҕуоруһуутун таһаарыа суохтаахтар, санитарнай- эпидемиологическай миэрэлэр тутуһуллуохтаахтар, ол иһигэр итэҕэл күннэрэ. Ордук улахан болҕомто бэтэрээннэри уонна аҕам саастаах дьону харыстыырга ууруллар.
Айсен Николаев эпидемиологическай быһыынан-майгынан улуустар уонна куорат уокуруктарын баһылыктарын кытары уочараттаах мунньаҕы ыытта. Өрөспүүбүлүкэ салайааччыта  миэстэтигэр балаһыанньалары истэн, билсэн баран бырааһынньыктар иннилэринээҕи күннэргэ кэккэ сүбэлэри биэрдэ.
«Бырааһынньыктары биһиги эпидемиологическай быһыы-майгы уустук соҕус кэмигэр көрсөбүт. Өрөспүүбүлүкэ үрдүнэн кэнники хонукка хоруона хамсыгынан 105 киһи ыалдьыбыта бэлиэтэннэ. Ордук элбэх киһи Дьокуускайга ыалдьыбыт. Кэнники күннэргэ оройуоннарга ыалдьар дьон ахсаана элбиир. Мэҥэ Хаҥалас оройуонугар быһыы-майгы уустугурда. Таатта, Алдан, Нерюнгри, Уус Алдан оройуоннарыгар быһыы-майгы эмиэ кытаатар«, — диэтэ кини.
Муниципальнай тэриллиилэр баһылыктарыгар саамай сүрүнүнэн, коронавируһунан ыалдьааччыны элбэппэт сорук турарын Ил Дархан тоһоҕолоон эттэ. Маай бырааһынньыктарыгар уонна үлэлээбэт күннэргэ дьон тоҕуоруһуутун таһаарбат, маассабай тэрээһиннэри тохтотор ордугун бэлиэтээтэ. Ордук улахан болҕомтону бэтэрээннэри уонна аҕам саастаах көлүөнэни харыстыырга ууралларыгар соруйда.
«Ыам ыйын 1 уонна 9 күннэринээҕи бырааһынньыктар тэрээһиннэрин хайаан да дистанционнай киэбинэн ыытыҥ, салюту тохтотуҥ. Ордук бэтэрээннэри уонна 65-тэн үөһээ саастаахтары харыстыырга улахан болҕомтоҕутун уураргытыгар көрдөһөбүн. Кинилэри тэрээһиннэргэ кыттыыттан тохтотуҥ, дистанционнайтан ураты. Ону сэргэ, кинилэргэ бырааһынньыгынан бэлэхтэри биэрэргитигэр, сэрэхтээх буолуу миэрэлэрин булгуччу тутуһуҥ. Кинилэргэ COVID-19 утары быһыыны ылбыт эрэ волонтердары ыытыҥ«, — диэн тоһоҕолоон эттэ. Ыам ыйын 11 күнүгэр (родительский день), уопсастыбаннай тырааныспардар кыраапыктарын чопчулуурга, тохтуур сирдэрин тэрийэргэ, кылабыыһаҕа санитарнай миэрэлэри тутуһуннарары хааччыйарга соруйда.
Маны таһынан, Ил Дархан үөрэх ыытыллыбат күннэригэр оскуолаларга, уһуйааннарга уонна бары үөрэх тэрилтэлэригэр дезинфекциялары оҥорорго, дезинфекциялыыр сириэстибэлэринэн, рециркулятордарынан, термометрдарынан хааччыллыыларын, кууһунан атыылыыр сирдэргэ уонна атыы-эргиэн кииннэригэр санитарнай миэрэлэр төһө тутуһуллалларын бэрэбиэркэлииргэ эттэ.
«Улуустарга эпидемиологическай быһыы-майгы бигэтийэригэр бу боппуруоһунан дьоһуннук ылсан дьарыктанаргытыгар көрдөһөбүн. Бытааннык да буоллар, биһиэхэ ыалдьааччылар ахсааннара эбиллэн иһэр. Бырааһынньыктар күннэригэр ыалдьааччы ахсаана эбиллибэккэ, бигэтийэригэр уонна кыччаан барарын туһугар бары миэрэлэр ылыллыахтаахтар», — диэн Айсен Сергеевич түмүктээтэ.
СӨ Ил Дархан уонна Бырабыыталыстыба пресс-сулууспата
Хаартыскаҕа Андрей Сорокин (СИА) түһэриитэ
0
0