Муус устар 11 күнүгэр сэрии бэтэрээнэ Василий Кузнецов 94 сааһын туолла. Кинини Айсен Николаев эрийэн истиҥник эҕэрдэлээтэ.
Ил Дархан ытык кырдьаҕас Аҕа дойдуну көмүскүүр сэриигэ киллэрбит кылаатын, ис дьыала уорганнарыгар өр сыллаах үтүө суобастаах үлэтин иһин махтанна. “Эпидемия буолбатаҕа буоллар, бэйэбинэн тиийэн эҕэрдэлиэм этэ” диэн эттэ.
Соторутааҕыта бэтэрээҥҥэ “1941-1945 сылларга Аҕа дойду Улуу сэриитигэр Кыайыы 75 сыла” диэн үбүлүөйдээх мэтээли туттарбыттара.
Василий Прокопьевич Кузнецов 1926 сыл муус устар 11 күнүгэр Өлүөхүмэ улууһун Кыыллаах сэлиэнньэтигэр төрөөбүтэ. Сэрии саҕаламмытыгар 15 саастааҕа. Эр дьон сэриигэ ыҥырыллан барбыттарыгар, кинилэри солбуйан, үлэ үөһүгэр түспүтэ.
1944 сыл ыам ыйын 2 күнүгэр бэбиэскэ тутан, сэриигэ ыҥырыллан барбыта. Бастаан Монголияҕа сулууспалаабыта. Японияны кытары сэрии саҕаламмытыгар, Маньчжурия кыраныыссатыгар ыыппыттара. Хинган хайаларын туоруур кыргыһыыга кыттыбыта. Японияны кыайбыттарын кэннэ, эмиэ Монголияҕа, онтон Кореяны кытары сэриигэ кыттыбыта.
Дойдутугар 1950 сыллаахха эргиллэн кэлбитэ. 1956 сылтан ис дьыала уорганнарыгар сулууспалыы киирбитэ. Участковай милиционертан саҕалаан, Жатайдааҕы милииссийэ отделын салайбыта. Анаабырдааҕы ис дьыала отделын силиэдэбэтэлинэн, куораттааҕы отдел инспекциятын начаалынньыгынан үлэлээбитэ.
Василий Кузнецов Аҕа дойду сэриитин II истиэпэннээх уордьанынан, “Японияны кыайыы иһин”, “Эҥкилэ суох сулууспатын иһин” мэтээллэринэн наҕраадаламмыта. Милииссийэ туйгуна, үлэ бэтэрээнэ.
Кэргэнэ Римманы кытта Хакасияҕа сулууспалыы сылдьан билсибиттэрэ, икки оҕоломмуттара.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru