Ил Дархан Айсен Николаев бэҕэһээ Горнай улууһугар үлэлээтэ. Күөрэлээххэ ойуур баһаарын умулларыыга аналлаах ыксаллаах быһыы-майгы хамыыһыйатын мунньаҕын ыытта.
Айсен Николаев бүгүҥҥү туругунан авиационнай хааччыйыыга саамай элбэх баһаар Горнай улууһугар буола турарын эттэ. Ол курдук улууска 21 сиринэн ойуур умайар. Ил Дархан уоту умуруорууга үлэ тэрээһиннээхтик ыытылларын уонна нэһилиэнньэлээх пууннарга куттал суоһаабатын эттэ. Ол гынан баран, куйаас уонна тыаллаах күннэр туралларынан сибээстээн, баһаар иэнэ өссө улаатыан сөбүн бэлиэтээтэ.
Улуус баһылыга Никита Андреев отчуоттаабытынан, билиҥҥи туругунан ойуур баһаардарыгар 500-кэ киһи итиэннэ 10 ДТ-75, 7 бульдозер, 20 «Белорус», 25 УАЗ уонна да атын техникалар үлэлииллэр.
Билигин Күөрэлээх сиригэр № 11-с ,№ 14-с уонна Одунуга № 4, № 5, № 21 нүөмэрдээх баһаардарга балаһыанньа тыҥааһыннаах.
Айсен Николаев мунньах түмүгүнэн, улуустааҕы суһал ыстаапка махталын биллэрдэ уонна муниципалитет баһылыгын көрдөһүүтүнэн Бэс Күөлүгэр ойуур баһаардарын умуруорууга эбии көмө оҥорорго сорудахтаата.
СӨ Ил Дарханын уонна бырабыыталыстыбатын пресс-сулууспата