“Билигин дьон-сэргэ үөрэххэ, доруобуйа харыстабылыгар, тутууга барытыгар ахсааны буолбакка, ордук хаачыстыбаны ирдииллэр. Онон ыйыллыбыт дьаһаллары олоххо хаачыстыбалаахтык киллэриигэ кыһаллыҥ”, — диэн бэлиэтээтэ Ил Дархан Егор Борисов олохтоох салайыныы сэбиэтин мунньаҕар улуус баһылыктарыгар туһаайан.
Мунньах саҕаланыыта кини быйылгы сыллаах бүддьүөт туолуутун уонна эһиилги былааннар тустарынан кэпсээтэ. Манна олоҕуран кини хамнаска иэстээх хаһаайыстыбаннай тэрилтэлэри кытары күүскэ үлэлэһэргэ сорудах биэрдэ. “Хаһаайыстыбаннай тэрилтэлэргитин ахсынньыга, тохсунньуга баран билсиҥ”, — диэн туран, тэрилтэлэри туруктаах оҥорууга туһуламмыт миэрэлэри барытын туһанарга эттэ. Манна сыһыаран эттэххэ, Ил Дархан бу боппуруоһу Анал этиитигэр эмиэ бэлиэтээн турар.
Эһиил олунньуттан Уһук Илин регионнарга биир гектар сири биэрии үһүс түһүмэҕэ саҕаланар. Онон нэһилиэктэр бары манна бэлэм олороллорун хааччыйарга эттэ. Ону сэргэ Нэһилиэнньэлээх пууннары тупсаран оҥоруу сылыгар туһуламмыт дьаһаллар салгыы да ыытыллыахтарын иһитиннэрэн туран, бу үлэҕэ ураты болҕомтону уурарга ыҥырда.
Ону сэргэ баһылыктарга эһиилгиттэн өрөспүүбүлүкэ бырайыагынан үлэ ньыматыгар киирэрин өссө төгүл санатта. Бэлиэтээн эттэххэ, сэрэдэҕэ буолбут пресс-конференциятыгар Егор Афанасьевич бу туһунан сиһилии кэпсээн турар. Онно кини төһө да өрөспүүбүлүкэ биир бастакынан судаарыстыбаннай бырагыраамаларынан бүддьүөтү тыырыы ньыматыгар киирдэр, билигин да министиэристибэлэр, биэдэмистибэлэр биир кыһалҕаны быһаарыыга тэҥҥэ сөпсөһөн үлэлии үөрэнэ иликтэрин ыйбыта. Ону туоратар сыалтан бырайыагынан үлэ киириэхтээҕин, хас биирдии госсулууспалаах бу бырайыактарга үлэлиэхтээҕин, сотору кэминэн олохтоох салайыныыга эмиэ киириэҕин эппитэ. Кини этэринэн, регионнааҕы уонна олохтоох салайыныы бииргэ үлэлээһиннэрин эһиил Үөһээ Бүлүүгэ ыытыллыахтаах “Манчаарыы оонньуулара” көрдөрүөхтээх. Онон эһиилги “Манчаары” үлэ саҥа ньыматыгар киириигэ биир эмиэ пилотнай бырайыак буолуоҕа.
Маны таһынан Егор Борисов кириисис кэмигэр ордук кыра дохуоттаах, элбэх оҕолоох ыаллар оҕустаралларын бэлиэтээн туран, көмө, бастакы уочарат, кинилэргэ туһуланыахтааҕын эттэ. Бу туһунан кини Анал этиитигэр бэлиэтээн турар. Манна даҕатан эттэххэ, элбэх оҕолоох ыалларга бэриллибит учаастактар инфраструктураларын оҥорууга Ил Дархан анал ыйаах таһааран турар. Онон эһиилгиттэн бу үлэ күргүөхмнээхтик барыаҕа.
Аграфена КУЗЬМИНА.