Ил Дархан баһылыктар хааччахтааһын миэрэлэрин кытаанахтык хонтуруоллуулларыгар ыйда
Бүгүн, кулун тутар 16 күнүгэр, Ил Дархан Айсен Николаев өрөспүүбүлүкэтээҕи суһал ыстаап мунньаҕын ыытта.
Тэрээһиҥҥэ улуустааҕы муниципальнай тэриллиилэр уонна куораттааҕы уокуруктар баһылыктара кыттыыны ыллылар. Ил Дархан сыстыганнаах COVID-19 дьаҥҥа ыалдьыбыт дьон ахсаанынан (100 тыһыынча нэһилиэнньэлээх эригийиэҥҥэ) 59 миэстэҕэ турарын иһитиннэрдэ.
Айсен Николаев баһылыктарга туһаайан санаатын тиэртэ:
— Икки нэдиэлэ иһигэр ыалдьыбыт дьон ахсаана 42-тэн тахса илик. Бүгүҥҥү күҥҥэ реанимацияҕа 25 киһи сытар. Онтон түөрдэ – ИВЛ аппараатыгар. Киһи ыалдьыбыта хойутаан биллэн, ыарахан ыарыһах буолан хаалар түбэлтэтэ үгүс. Онон ыарыы сибикитин тута билэн эмтиир көдьүүстээх. Вакцинацияны ыытыыга өйдөтөр-сэрэтэр үлэни утумнаахтык тэрийиэххэ наада. COVID-19 дьаҥы утары бастакы быһыыны 55206 киһи ылла, иккиһи – 34319 киһи. Вакцина кэллэ да, оройуоннарга суһаллык тиэрдиллэр. Бастатан туран, 65 саастарын ааспыт кырдьаҕастарга уонна хроническай ыарыылаах дьоҥҥо быһыыны биэрии соруга турар. Дьон бу категориятыгар быһыы көрдөрүүтэ намыһах, онон бу боппуруоһу болҕомтоҕо ыларгытыгар. Сотору сааскы сынньалаҥ күннэрэ саҕаланыахтара. Онон оскуола дириэктэрдэрэ уонна төрөппүттэр оҕолор иллэҥ кэмнэрин атаарыыларын хонтуруолга ылаллара наада, үөрэх тэрилтэлэрин ыраастык тутууну күүһүрдэр сорук турар. ОРВИ ыарыы сезона кэлбитинэн, коронавирус тарҕаныытын уонна бу ыарыыны утары бохсууга көдьүүстээх үлэ ыытыллыан наада.
Суһал ыстаап суолталаах тэрээһинигэр Сунтаар, Чурапчы, Алдан оройуоннарын баһылыктара санааларын үллэһиннилэр. Ил Дархан мунньаҕы түмүктүүрүгэр баһылыктарга сэрэхтээх буолалларыгар уонна хааччахтааһын миэрэлэрин кытаанахтык хонтуруоллуулларыгар сүбэлээтэ.
Елена ПОТОЦКАЯ, “Саха сирэ” хаһыат, edersaas.ru