Бүгүн, балаҕан ыйын 25 күнүгэр, СӨ Ил Дарханын олохтоох бэйэни салайыныыга Сэбиэтин мунньаҕар ойуур баһаарын туһунан кэпсэттилэр.
edersaas.ru
Айылҕа харыстабылын миниистирэ Сахамин Афанасьев иһитиннэрбитинэн, Уус Алдан, Чурапчы улуустарыгар 200 гектар сир умайа турар. Бүгүн бу улуустарга алта баһаары умуллара сылдьаллар.
Ил Дархан Айсен Николаев өрөспүүбүлүкэҕэ тахсар баһаардар төрүөттэрин ыйда: «Өскөтүн баһаар сайыҥҥы кэмҥэ кураанах этиҥтэн үөскүүр буоллаҕына, өртөөһүҥҥэ эппиэтинэһэ суох буолууттан. Олохтоох муниципалитет маннык быһыыга-майгыга эппиэтинэс ыларын өйдүөх тустаах. Хас биирдии муниципальнай тэриллии баһаары умулларыы бэдэрээлинэй тиһигэр киирсэр. Суһал быһаарыыны ылыыга, баһаары умулларыыга ээл-дээл сыһыаннаһар табыллыбат».
Ил Дархан муниципалитет баһылыктарыгар инникитин бу боппуруоһу кытаанах хонтуруолга ылалларыгар модьуйда. Тустаах министиэристибэлэргэ, биэдэмистибэлэргэ, ол иһигэр СӨ Ис Дьыала министиэристибэтигэр, ЫБММ СС управлениетыгар, Борокуратуураҕа эрэкэмэндээссийэлэри тиэртэ. Экология министиэристибэтэ, Нэһилиэнньэҕэ куттал суох буолуутун хааччыйар кэмитиэт уонна олохтоох бэйэни салайыныы уорганнара тэҥҥэ үлэлээн, бу күннэргэ баар баһаардары барыларын умулларарга диэн соруйда.
Ирина Ханды, “Саха сирэ” хаһыат, edersaas.ru