Бүгүн, ахсынньы 30 күнүгэр, Ил Дархан Айсен Николаев Мохсоҕоллоох бөһүөлэгэр уонна Покровскай куоракка үлэлиир. Бу туһунан кини пресс-сэкирэтээрэ Афанасий Ноев иһитиннэрэр.
Оробуочай сырыы чэрчитинэн, Ил Дархан төрөппүт көрүүтэ суох хаалбыт оҕолорго көмөлөһөр Мохсоҕоллоохтооҕу кииҥҥэ сылдьыаҕа. Бырааһынньыгы көрсө Айсен Сергеевич оҕолорго кэһиитин, ол иһигэр «Үтүө санаа харыйата» аахсыйанан Влад Старковка бэлэҕин туттарыаҕа.
Покровскайга Айсен Николаев хаарбах дьиэтээн көһөрүү бырагырааманан тутуллубут саҥа дьиэҕэ сылдьыаҕа.
Итиэннэ СӨ баһылыга бу куоракка баар саҥа оҥоһуллубут биэрэк үрдүнээҕи күүлэйдиир, сынньанар сири көрүөҕэ. Бу бырайыак 2019 сыллаахха бүтүн Арассыыйатааҕы «Кыра куораттар уонна историческай сирдэр» куонкуруска кыайан, федеральнай үбүнэн олоххо киирбитэ.
Ил Дархан уонна Бырабыыталыстыба пресс-сулууспата.