Ил Дархан Айсен Николаев от ыйын 13 күнүгэр урбаанньыт Арсен Томскайы кытары видеосибээһинэн кэпсэтэ сырытта.
Кинилэр ойуур баһаардарын утары охсуһуу, уоту умуруорарга саҥа ньымалары көрдөөһүн туһунан кэпсэттилэр. Ону тэҥэ, Арсен Томскай тэрийбит “Sinet Spark” бырайыактыыр тэрилтэтин үлэтин ырыттылар. Бу кэмиэрчэскэйэ суох тэрилтэ Саха сирин култуурата, науката сайдарыгар туһулаан үлэлиир.
Холобур, саха киинэтин уһулааччыларга, блогердарга грант олохтообута. Дьокуускай куоракка быыл тоҕо үөскүүрүн быһаарарга чинчийии ыыппыта, тыйыс кыһыҥҥа таас куупал анныгар олорор хайдаҕын чинчийбиттэрэ. Ону тэҥэ, IT-хайысханан оҕолору үөрэтэллэр, аан дойду бастыҥ университеттарыгар үөрэнэр кыах биэрэллэр. Арсен Томскай бэйэтэ АХШ-ка олорор, “Индрайвер” хампаанньаны аан дойду үрдүнэн сайыннарарга үлэлэһэр.
Айсен Николаев өрөспүүбүлүкэ сайдыытыгар өйөбүлүн, гражданскай көҕүлээһиннэри сайыннарарын иһин Арсен Григорьевичка махтанна.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru