Бүгүн Саха сиригэр Арктика күнэ бэлиэтэнэр. Ил Дархан Айсен Николаев Арктика күнүнэн өрөспүүбүлүкэ олохтоохторун эҕэрдэлээтэ.
—Биһиги өрөспүүбүлүкэбитигэр Арктика сайдыытын боппуруостара улахан суолталаахтар. 34 улуустан 13-һэ Российскай Федерация Арктическай зонатыгар киирэллэр. Бүгүн биһиги сыалбыт диэн бу тыйыс усулуобуйалаах уонна ураты сири сайыннарыы буолар. Маннык соругу биһиги иннибитигэр РФ бэрэсидьиэнэ Владимир Путин туруорбута.
Арктиканы сайыннарыы былаана хотугу муора суолун, аэропортары саҥардыы, дьоҕус авиацияны сайыннарыы, суолу тутуу, нэһилиэнньэни интэриниэтинэн хааччыйыы, социальнай уонна инфраструктурнай эбийиэктэри тутуу, үөрэҕириини, мэдиссиинэни сайыннарыыттан турар. Биһиги уопсай күүһүнэн Арктика сайдыытын ситиһиэхпит диэн эрэнэбит! Барыгытыгар кытаанах доруобуйаны, дьолу-соргуну, чэгиэн доруобуйаны баҕарабын!, — диэн эҕэрдэтигэр эттэ.
edersaas.ru