Ытыктабыллаах Саха сирин олохтоохторо!
Саха Өрөспүүбүлүкэтин салалтатын аатыттан уонна тус бэйэм ааппыттан Арассыыйа күнүнэн эҕэрдэлиибин!
Бу судаарыстыбаннай бырааһынньык биир кэлим устуоруйабытын, саҥа суолу талбыт дойду күүһүн чөлүгэр түһэриини, Арассыыйа судаарыстыбаннаһын бөҕөргөтүүнү кэрэһилиир.
30 сыллааҕыта, 1990 сыл бэс ыйын 12 күнүгэр, Арассыыйа саҥа устуоруйата саҕаламмыта – бу күн РСФСР судаарыстыбаннай суверенитетын туһунан Декларация ылыллыбыта. Ааспыт сыллар усталарыгар устуоруйа үгэстэригэр, элбэх омук иллээх олоҕор уонна сомоҕолоһор күүһүгэр тирэҕирэн, дойдубут тэтимнээхтик сайынна.
Быйыл биһиги дойдубут Улуу Кыайыы 75 сылын бэлиэтээтэ. Ийэ дойдубут дьылҕатын туһугар үрдүк эппиэтинэспитин, олорон ааспыт көлүөнэлэри кытта быстыбат ситиммитин, төрөөбүт дойдуга бэриниилээх буолуу утумун модун күүһүн көрдөрдүбүт.
Аҕыйах хонугунан Арассыыйа Федерациятын Конституциятыгар уларытыылары киллэриигэ Бүтүн Арассыыйатааҕы куоластааһын ыытыллыаҕа. Арассыыйа бэрэсидьиэнэ Владимир Путин Сүрүн сокуоҥҥа Арассыыйа Федерациятын суверенитетын уонна сирин-уотун биир кэлимин, устуоруйа кырдьыгын уонна дойду бары норуоттарын ураты култуураларын көмүскээһин, социальнай мэктиэлэри кэҥэтии, оҕо сааһы өйөөһүн курдук тутаах уларытыылары киллэриини көҕүлээбитэ. Олохпутугар салайтарар Сүрүн сокуоммутугар уларытыылары өйүүр инниттэн Саха сирин олохтоохторо Бүтүн Арассыыйатааҕы куоластааһыҥҥа көхтөөхтүк кыттыахтара диэн бигэтик эрэнэбин.
Саха сирэ Арассыыйа Федерациятын саамай бөдөҥ эрэгийиэнин быһыытынан судаарыстыба Уһук Илиҥҥэ ыытар экэнэмиичэскэй бэлиитикэтин уонна социальнай эйгэҕэ национальнай соруктары олоххо киллэриигэ быһаччы кыттар. Биһигини барыбытын Аҕа дойдуга таптал, дойдубут сайдарын туһугар айымньылаах үлэ, үүнэр көлүөнэҕэ истиҥ сыһыан сомоҕолуур.
Эһиэхэ эйэлээх олоҕу, этэҥҥэ буолууну, Улуу Арассыыйа чэчирии сайдарын туһугар таһаарыылаах үлэни-хамнаһы, бары саҕалааһыннаргытыгар ситиһиини баҕарабын!
Айсен НИКОЛАЕВ,
Саха Өрөспүүбүлүкэтин Ил Дархана.