Коронавирус дьаҥын балаһыанньата өрөспүүбүлүкэҕэ уустук. Өрөспүүбүлүкэтээҕи суһал ыстаап мунньаҕар Ил Дархан Айсен Николаев билигин холкутуйарга эрдэ диэн эттэ.
Кини исписэлиистэр иһитинэрбит сабаҕалааһыннарынан, ыалдьар дьон ахсаана төһө да элбээбитин иһин, дьон бу дьаҥы арыый чэпчэкитик аһарар, ордук вакцина ылбыт дьон буолалларын бэлиэтээтэ. Суһал ыстааптар миэстэтигэр вакцина уонна ревакцинация боппуруоһугар сүрүн болҕомтолорун ууруохтаахтар. Саха сирин Роспотребнадзорун дааннайынан, билиҥҥи туругунан вакцина бастакы компоненын ылбыт дьон ахсаана 79,9%, оттон ревакцинацияламмыт дьон ахсаана – 60,0% тэҥнэспит. Вакцина ылыытыгар намыһах көрдөрүүлээх улуустар ааспыт нэдиэлэ түмүгүнэн көрдөрүүлэрэ балачча тахсыбыт. Ааспыт нэдиэлэҕэ эрэгийиэҥҥэ ПЦР анаалыһы уонна ИХА тест оҥоруу элбээбит. Бу ыалдьар дьону суһаллык быһааран эмтииргэ көдьүүстээх. СӨ Ил Дархана Айсен Николаев коронавирус дьаҥыттан эмтэнэр нэһилиэнньэни босхо эминэн хааччыйар туһунан боппуруоһу сүрүн хонтуруолга ылары соруйда. Манна таһыттан эмтэнэр дьон эмиэ киирсэллэр. Ил Дархан ыалдьыбыт дьону босхо эминэн хааччыйыы хайаан да толоруллуохтааҕын тоһоҕолоото. Ону сэргэ, Ил Дархан Росздравнадзорга күннэтэ эмп саппааһын өрөспүүбүлүкэ бары, ол иһигэр судаарыстыбаннай уонна чааһынай аптекаларга бэрэбиэркэлиир туһунан соруйда. Маны таһынан сугулаан кыттыылаахтара болҕомтолорун «Триумф» успуорт киинигэр тэриллибит амбулаторнай кииҥҥэ уурдулар. Манна орви, дьаҥҥа сутуллубут эрэ киһи кэлэн көрдөрөн анаалыс туттарыахтаах, онон дьону-сэргэни бу кииҥҥэ ханнык кэмҥэ тиийиэххэ сөбүн туһунан иһитиннэрии наадалааҕа ыйыллыбыт.
Ульяна ЗАХАРОВА.