Саха сирин Ил Дархана Анаабыр оройуонун социальнай-экэнэмиичэскэй сайдыытын туһунан
Айсен Николаев кулун тутар 2 күнүгэр Анаабыр национальнай (долган-эбэҥки) оройуонугар сырыытын түмүгүн таһаарда. Миниистирдэр кэбиниэттэрин чилиэннэрэ кыттыылаах мунньахха Саха сирин Ил Дархана улуус социальнай-экэнэмиичэскэй сайдыыта үчүгэй тэтимнээҕин бэлиэтээтэ.
“Анаабыр оройуонун тэтимнээх сайдыытын алмаас бырамыысыланнаһын кытта ситимниибит. Манна “Анаабыр алмаастара” хампаанньа үлэлиир. Маны сэргэ углеводороднай сырьену көрдүүр хампаанньалар үлэлэрин саҕалаатылар. Томтордооҕу баайдаах сиргэ дэҥҥэ көстөр металлары чинчийэр уонна хостуур үлэлэр оройуон экэниэмикэтин сайдыытыгар эмиэ төһүү буолаллар”, — диэтэ Айсен Николаев.
Баар кыһалҕалары оройуон салалтата бырамыысыланнас тэрилтэлэрин кытта ыкса ситимнээхтик быһаарар. Маны Үрүҥ Хайаҕа тутуллубут “Долган” Хоту дойду норуоттарын култууратын уонна искусствотын Арктикатааҕы дыбарыаһын арыйыы туоһулуур.
Регион баһылыга этэринэн, тыа хаһаайыстыбатыгар улахан суолта бэриллэр.
Мунньахха оройуон баһылыга Иван Семенов 2032 сылга диэри оройуон социальнай-экэнэмиичэскэй сайдыытын бырагырааматын сүрүн хайысхаларын туһунан кэпсээтэ. Итилэр ортолоругар – киһи хапытаалын, гражданскай уопсастыбаны сайыннарыы, тыа сирин олоҕун хаачыстыбатын үрдэтии уонна экэниэмикэ тирэхтээх үүнүүтэ.
Улуус салайааччыта статистика чахчыларын холобурдаата. Кини туруктаах буолууну кэнники биэс сылга сыллата нэһилиэнньэ бэйэтин айылгытын быһыытынан эбиллиитинэн уонна үлэтэ суох буолуу аччааһынын кытта ситимнээтэ.
Айсен Николаев Анаабыр национальнай (долган-эбэҥки) оройуонугар сырыытын кэмигэр “Анаабыр алмаастара” аахсыйалаах уопсастыба эбийиэктэригэр эмиэ сырытта. Хампаанньа генеральнай дириэктэрэ Павел Маринычевы кытта Үрүҥ Хайаҕа ньиэп баазатын уонна алмааһы хостуур үлэ ыытыллар “Майаат” бириискэҕэ сырытта.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.