Ил Дархан «Алмас» ойуур промышленноһын комплексыгар аныгы технологиянан саҥардыллыбыт үлэ көрүҥүн үөрэттэ
Бүгүн Ил Дархан Айсен Николаев «Алмас» ойуур промышленноһын комплексын собуотугар аныгы технологиянан саҥардыллыбыт көрүҥ үлэҕэ киирэр түгэнигэр кыттыыны ылла.
Саҥа тэрили собуокка үлэлэтии, биллэн турар, үлэ хаамыытын, оҥорон таһаарыы кээмэйин үрдэтиэҕэ. Ол эбэтэр сылга 150 тыһыынча кубометр тутуу матырыйаала уонна 75 тыһ.кубометр кэриҥэ бэлэм бородууксуйа оҥоһуллан тахсыаҕа. Үлэ усулуобуйатын саҥардыыга саҥа тэрили уонна тиэхиньикэни атыылаһыыны тэҥэ, үлэ кээмэйэ улаатыытын уонна үлэлиир сири тупсарыыны кытта ыкса сибээстээх.
Ил Дархан тэрилтэ производственнай үлэтин көрдө-иһиттэ.
— Ойуур промышленноһын комплекса сайдыытыгар чааһынай олорор дьиэҕэ туттуллар тутуу матырыйаалын хото оҥорон таһаарыы соруга турар. Оччотугар өрөспүүбүлүкэ олохтоохторун сөбүгэр сыаналаах хаачыстыбалаах тутуу матырыйаалларынан кэбэҕэстик туһаныа этилэр, — диэн бэлиэтээтэ Айсен Николаев.
«Алмас» тэрилтэ кэнэҕэс Дьокуускайы таһынан, Витимҥэ үлэ ыытар былааннаах. Бу тэрилтэ тутуу маһынан Горнай улууһун Бэс Күөлүгэр 31 саҥа дьиэ тутуллубута.
Елена ПОТОЦКАЯ, «Саха сирэ» хаһыат