Ил Дархан Айсен Николаев “Алмаасэргиэнбаан” бырабылыанньатын бэрэссэдээтэлэ Николай Долгунову кытары көрүстэ. Баан бу сыл тоҕус ыйынааҕы үлэтин түмүгүн, инники былааннарын туһунан кэпсэттилэр.
Николай Долгунов кэпсээбитинэн, коронавирус “Алмаасэргиэнбаан” сайдыытын былааныгар уларыйыылары киллэрбит.
— Пандемия кэмигэр дьон баан отделениеларыгар аҕыйахтык сылдьар уонна онлайн-сервистэринэн хото туһанар буоллулар. Ырытан көрбүппүт, муус устарга күннэтэ мобильнай баанынан туһанар дьон офиспытыгар кэлэр килийиэннэрбитинээҕэр 5 төгүл элбэх этилэр. Сыл саҕаланыаҕыттан “АЭБ Онлайн” мобильнай сыһыарыыны туһанааччылар ахсааннара 70% элбээбит. Урбаанньыттар уонна юридическэй сирэйдэр төлөбүрдэрин 90%-на “АЭБ Бизнес” сыһыарыы нөҥүө оҥоһуллар, — диэн бэрэссэдээтэл кэпсээтэ.
Ол түмүгэр, бааҥҥа цифровой отдел үлэһитин ахсаана 40-тэн 109 киһиэхэ диэри элбээбит. Ол үлэһиттэр уопсай ахсааннарыттан 14,5%-нын ылар эбит. Өссө да элбэтэр былааннаахтар. Бу хайысханы сайыннарар туһуттан баан WardHowell уонна Ancor хампаанньалары кытары дуогабар түһэрсибит.
Пандемия кэмигэр “АЭБ” кирэдьиит каникулларын олохтоон, дьоҥҥо көмөлөспүт (иэс уопсай суумата 606 мөлүйүөн солкуобай).
Айсен Николаев баан ыыппыт үлэтин үчүгэйинэн сыаналаата.
— Саха сиригэр “Алмаасэргиэнбаан” килийиэннэрин ахсаана — 300-тэн тахса тыһыынча. Онон уустук усулуобуйаҕа “АЭБ” сервистэрин кылгас кэмҥэ уларытан, дьон үрдүк хаачыстыбалаах өҥөнү түргэнник, табыгастаахтык ыларын ситиһиэхтээххит. Цифровизация уонна технологизация хайысхаларын талан, сөпкө баран иһэҕит. Аныгы үйэҕэ маннык ньыма ырыынакка күрэстэһэр уонна салгыы сайдар кыах биэриэҕэ, — диэн кини бэлиэтээтэ.
Ангелина Васильева, “Саха сирэ” хаһыат, edersaas.ru