Ил Дархан Аллараа Бэстээххэ паром накопителин үлэтин бэрэбиэркэлээтэ
Ил Дархан Айсен Николаев бэҕэһээ, атырдьах ыйын 26 күнүгэр, Мэҥэ Хаҥалас улууһугар үлэлээтэ. Кини Аллараа Бэстээххэ паромҥа массыыналар уочараттаан киирэр накопителин үлэтин бэрэбиэркэлээтэ.
Накопитель Айсен Сергеевич сорудаҕынан оҥоһуллан, болдьоммут кэмиттэн — атырдьах ыйын 13 күнүттэн үлэлиир. Манна түөрт балаһанан 170 легковой уонна 42 таһаҕас тиэйэр массыына киирэр. Тустаах инфраструктура барыта баар — тэҥнэммит былаһаакка, диспетчер пууна, уот лиинийэтэ, видеонан кэтээн көрүү систиэмэтэ, светофордар, суол бэлиэлэрэ, шлагбаумнар уо.д.а.
Айсен Николаев Мэҥэ Хаҥалас улууһун уонна «Паромы Якутии» хампаанньа салалталарын кытта эбийиэк үлэлиирин тухары куттал суох буолуутун, кэҥэтии, «Экология» нацбырайыак чэрчитинэн биэрэги бөҕөргөтүү үлэтин ыытыы тула кэпсэттилэр.
Эһиил, 2022 сылтан, суоппардар накопительгэ туран айан төлөбүрүн терминалтан эбэтэр төлөпүөн сыһыарыытынан онлайн ыытар буолуохтара диэн былаан баар.
Ил Дархан уонна Бырабыыталыстыба дьаһалтатын пресс-сулууспата.
Андрей Сорокин хаартыскалара.