Бүгүн, кулун тутар 27 күнүгэр, олимпийскай чөмпүйүөн Алина Загитова Muus uSTAR бэстибээлгэ кытта Дьокуускайга кэллэ. Кинини кытта Ил Дархан Айсен Николаев көрүстэ.
Ил Дархан хаҥкыһыт ыҥырыыны ыланан Саха сиригэр кэлбитигэр махтанна уонна аан дойду чөмпүйэнээтигэр үс бастакы миэстэни Арассыыйа спортсменнара бастакытын ситиспиттэринэн эҕэрдэлээтэ.
«Билиҥҥитэ бу көрүҥ биһиги өрөспүүбүлүкэбитигэр улаханнык сайда илик, ол эрээри сүүсчэ оҕо номнуо дьаныардаахтык дьарыктанар. Олимпийскай чөмпүйүөн Алина Загитова сырыыта фигурнай хаҥкылааһын уонна да атын көрүҥнэр сайдалларыгар төрүөт буолуо», — диэн Айсен Сергеевич санаатын эттэ.
Алина Загитова үрдүк тэрээһиннээх бэстибээлинэн уонна истиҥ көрсүү иһин Ил Дархаҥҥа махтанна. Кини бэстибээл чэрчитинэн маастар-кылаас ыытыаҕа уонна шоуга кыттыаҕа.
Көрсүһүү түмүгэр Айсен Николаев Алина Загитованы Ыһыахха ыҥырда уонна хомус бэлэхтээтэ.
Ил Дархан уонна Бырабыыталыстыба пресс-сулууспата.
Андрей Сорокин хаартыската, СИА.