Бүлүү эбэҕэ буолбут быһылаан аны хатыламматын диэн Д.Г. Макаров аатынан «Зеленый пояс Вилюя» экологическай пуонда (сал. П.Г. Макарова) балаҕан ыйыгар «Ыраас Бүлүү — мин ырам» диэн аахсыйаны тэрийэн ыыппыта.
edersaas.ru
Бүлүүлэр биир дойдулаахпыт, улуус лесхоһун таһаарыылаахтык салайбыт, Тааһаҕар уонна Дьөккөн нэһилиэктэриттэн оройуон сэбиэтигэр дьокутааттаабыт, уопсастыбанньык Дмитрий Макаров аатынан «Зеленый пояс Вилюя» айылҕа харыстабылын пуондата тэриллибитэ биэс сыл буолла. Бу уопсастыбаннай тэрилтэ кэм-кэрдии дьоҕус кэрчигин устата ыытар үлэтэ дьоһуннааҕынан, суолталааҕынан дьон-сэргэ биһирэбилин уонна махталын ылыан ылла. Улууспутугар сыл аайы «Бүлүү Эбэ күнэ» тэрээһиннээхтик ыытыллар. Оҕолор уруһуйдарын, хоһоон ааҕыытын куонкурустара, араас викториналар, бэсиэдэлэр тиһигин быспакка ыытыллаллар.
Айылҕа харыстабылын пуондатын үлэһиттэрэ сыл аайы сибэкки арассаадатын, Саха сиригэр үүнэр мастары олордору сүбэлииллэр, олохтоох нэһилиэнньэҕэ киэҥник тарҕаталлар. Кыадаҥдаҕа Дьокуускайтан Арктикатааҕы култуура институтун ректора уонна устудьуоннара кыттыылаах «Кымыс ыһыаҕа» тэрээһин үрдүк таһымнаахтык ыытыллыбыта. Ричард Маак Бүлүү улууһугар сылдьан, бүлүүлэр олохторун-дьаһахтарын туһунан кинигэтигэр киллэрэн, бүтүн аан дойдуга биллэрбитин туоһулуур Мэҥэ тааһы быйыл туруоран үйэтиттибит. Пуонда сүрүннээн Бүлүү эбэ харысхалыгар «Ыраас Бүлүү — ыра санаам» өрөспүүбүлүкэтээҕи аахсыйатыгар Дьокуускайтан, Мииринэйтэн тиийэ кыттыыны ыллылар. Аахсыйа кыттыылаахтара 4000 кумааҕы кыталыкчааннары оҥорон, ийэ айылҕаны харыстыырга биир санаалаах буоларга ыҥырдылар. Ордук кэрэхсэбиллээҕэ, айылҕаны харыстыыр үлэҕэ оҕо уһуйааннарын иитиллээччилэриттэн саҕалаан, оскуола үөрэнээччилэрин хабан, кэллиэс, техникум устудьуоннарын кытыннардыбыт.
«Ыраас Бүлүү — ыра санаам» өрөспүүбүлүкэтээҕи аахсыйаны түмүктүүр бэлиэ киэһэҕэ тэрээһин кыттыылаахтара биир санаанан муус-маҥан кыталыкчааннары Ил Дархан Айсен Николаевка, РФ Бэрэсидьиэнэ Владимир Путиҥҥа, «АЛРОСА» АХ бэрэсидьиэнэ Сергей Ивановка ыытарга быһаарыы ылыммыттара.
Бу күннэргэ Бүлүү эҥэр улуустарын уопсастыбаннаһын санаатын толорон, айылҕа харыстабылын пуондатын салалтата Бүлүү улууһун уопсастыбанньыктарын кытта «Ыраас Бүлүү — ыра санаам» аахсыйа кыттыылаахтарын баҕа санааларын толордо. Айылҕа ыраас буоларын туоһулуур символы — кумааҕы кыталыктары Ил Дархан Айсен Николаевка туттарда.
Надежда ИВАНОВА, Бүлүү.
«Саха сирэ» хаһыат, edersaas.ru саайтка анаан