Ил Дархан Айсен Николаев ыйытыыларга хоруйдаата
Олох-дьаһах

Ил Дархан Айсен Николаев ыйытыыларга хоруйдаата

Бүгүн, бэс ыйын 19 күнүгэр, Ил Дархан Айсен Николаев социальнай ситимнэр нөҥүө быһа биэриигэ тахсан,  ыйытыыларга хоруйдаата. 

edersaas.ru

Ол курдук, «Хааччахтаныы эрэсиимин уһулуу ханнык түһүмэххэ тиийдэ?» диэн ыйытыы киирдэ.

Хоруй: — Бу ыйытыыга от ыйын 1 күнүн кэннитэн биирдэ төннүөхпүт. Билигин хааччахтаныы эрэсиимэ бэс ыйын 26 күнүгэр диэри уһатылынна.

Ыйытыы: — Мииринэй куоракка коронавирус тарҕаныытын утары үлэ хайдах  ыытылларый?  Мииринэй куоратхарантыыҥҥа сабыллыа дуо?

Хоруй: — Мииринэй куорат харантыыҥҥа сабыллыбат. Кэлэр нэдиэлэҕэ ыарыы тарҕамматын туһугар ыытыллар үлэ тэриллиитигэр Мииринэйгэ Өрөспүүбүлүкэтээҕи суһал ыстааптан көмө барыаҕа.

Ыйытыы: — Чульмаҥҥа хас да кыбартыыралаах дьон олорор  дьиэтигэр  баахтабай үлэһиттэр хааччахтанан олороллор. Дезинфекция  күн аайы ыытыллыбат.

Хоруй: — Дезинфекция ыытыллыахтаах. Аадырыскытын чопчу ыйбыккыт буоллар, билигин Чульман баһылыгар биллэриэм этэ.

Ыйытыы: — Дьокуускай — Өлүөхүмэ туһаайыытынан «метеор» хаһааҥҥыттан сылдьыай?

Хоруй: — От ыйын 1 күнүттээн биирдэ бу боппуруос быһаарыллыаҕа. Ол да буоллар, сотору уу суолунан сырыы саҕаланыа диэн эрэнэбин.

Ыйытыы:— Хааччахтаныы эрэсиимин тутуһар биэнсийэлээхтэргэ эрэсиим уһуллуутугар  2-лии тыһыынча бэриллиэхтээх этэ. Ол харчы хаһан түһүөй?

Хоруй: —  Хааччахтаныы эрэсиимэ бүтэ илик. Ол да буоллар, испииһэк оҥоһулла сылдьар. Кэмигэр түһүөҕэ.

Ыйытыы: — Быйыл үөрэххэ туттарсыы хайдах ыытылларый?

Хоруй:  — Үөрэххэ туттарсар докумуону куйаар онлайнынан ыытыллар. Үөрэх бары  кыһаларын саайтарыгар туттарсыы бэрээдэгэ, ирдэбилэ быһаарыллан суруллар.

Ыйытыы: — Былааннаммыт эпэрээссийэлэр хаһааҥҥыттан ыытыллыахтарай?

Хоруй: — Суһал эпэрээссийэлэр бары оҥоһулла тураллар. Бу үс ый иһигэр түөрт тыһыынчаттан тахса эпэрээссийэ оҥоһулунна. Былааннаммыт эпэрээссийэлэр от ыйын 1 күнүн кэнниттэн көҥүллэниэхтэрэ диэн эрэнэбит.

Ыйытыы: — Быыбар күнэ көһүө дуо?

Хоруй: — Төрүт сокуоҥҥа киирэр көннөрүүлэри куоластааһын болдьоҕо уларыйбат. Бэс ыйын 25 күнүттэн быыбардыыр  учаастактар үлэлэрин саҕалыахтара.

 

Бэлэмнээтэ Ньургуйаана Иванова,  «Саха сирэ» хаһыат,  edersaas.ru

Хаартыска: интэриниэттэн

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

19 − 13 =