Ил Дархан Айсен Николаев балаҕан ыйын 1-4 күннэригэр Владивосток куоракка ыытыллар VI Илиҥҥи экэнэмиичэскэй форум тэрээһинигэр кытта сылдьар.
Ил Дархан пресс-сэкиритээрэ Афанасий Ноев иһитиннэрбитинэн, Айсен Николаев форум чэрчитинэн, РФ тутаах министиэристибэлэрин, биэдимистибэлэрин уонна Арассыыйа, омук дойдуларын бөдөҥ хампаанньаларын салайааччыларын кытта көрсөн, өрөспүүбүлүкэ социальнай-экэнэмиичэскэй сайдыытын боппуруостарын тула кэпсэтиэҕэ. Форум кэмигэр Саха сирин сайыннарыыга тутаах хайысхаларга бииргэ үлэлииргэ аналлаах Сөбүлэһиилэр түһэрсиллиэхтэрэ.
Ол курдук, Айсен Николаев Владивосток куоракка «Мицуи энд Ко. Москоу» хампаанньа генеральнай дириэктэрэ уонна СНГ-га «Мицуи» кылаабынай управляющайа Хироси Мегуроны кытта көрүстэ.
Ил Дархан иһитиннэрбитинэн, Япония хампаанньаларын кытта бииргэ үлэлээһин Саха сирин биир инники күөҥҥэ сылдьар хайысхатынан буолар. Санатар буоллахха, 2018 сыллаахха «Мицуи» хампаанньа Булуҥ улууһун Тиксии бөһүөлэгэр тыал күүһүнэн үлэлиир эниэргийэни оҥорор установкалары туруорбута.
«Япония технологията биһиги тыйыс усулуобуйабытыгар көдьүүстээҕин дакаастыыллар. «Мицуи энд Ко. Лтд.» хампаанньа Саха сирин кытта 2018 сылтан үлэлиир. Биһиги бииргэ үлэлиир бырайыактарбыт Арассыыйа уонна Япония сыһыаннаһыыларыгар улахан олугу уураллар», — диэн Айсен Николаев иһитиннэрдэ.
Тойон Хироси Мегуро чуолаан Өлүөнэ муостаны тутууга New-PWS диэн вантовай систиэмэни туһаныахха сөбүн туһунан этини киллэрдэ. Итини тэҥэ, «Өйдөөх куорат» диэн муниципальнай бырайыагы олоххо киллэриигэ бииргэ үлэлиэхтэрин сөбүн иһитиннэрдилэр.
СӨ Ил Дарханын уонна СӨ Бырабыыталыстыбатын пресс-сулууспата