Туймаада ыһыаҕар «Киэргэ» ювелирнай фирма түһүлгэтигэр уустар түһүүлэнэллэр. Манна быыстапка бэртээхэйэ ыытыллар итиэннэ, быйыл, уустар өрөспүүбүлүкэтээҕи форумнара тэриллэн ыытылынна.
Түһүлгэҕэ Ил Дархан уустар былыргы ньымалары сөргүтэн туһаналларын, тимири ууһаарыыга күүскэ ылсыбыттарын хайҕаата, чорботон бэлиэтээтэ. Үлэни-хамнаһы тиһиктээхтик ыыталларыгар Саха сирин уустарын Сойуустарыгар махтанна. Былырыыҥҥы ыһыахха тимир уустара Намтан аҕалыллыбыт урууданы түүн иһигэр сатабыллаахтык туттан уһаарбыттарын сөҕөн-махтайан аҕынна. Маны сэргэ, Айсен Николаев меценат, «Киэргэ» ювелирнай фирма генеральнай диэрэктэрэ Александр Павлов сахалыы киэргэли тарҕатыыга болҕомтотун ууран күүскэ үлэлэһэрин бэлиэтээтэ.
Ил Дархан уустар үлэлэрин көрдө-иһиттэ, «Дэгиттэр быһах» куонкуруска сырытта. Саха ууһугар туруоруллубут пааматынньык аһыллыытыгар кыттыыны ылла диэн СӨ Ил Дарханын уонна Бырабыыталыстыбатын пресс-сулууспата иһитиннэрдэ.
Хаартыска: СИА-ттан ылылынна