Ил Дархан Айсен Николаев: «Урукку олохпутугар төннөр туһунан толкуйдуур кэммит кэллэ»

Бүгүн, ыам ыйын 10 күнүгэр, Ил Дархан Айсен Николаев нэһилиэнньэҕэ туһаайан этиитигэр: “Инникибитин барыллаан көрөн, сыыйа хааччахтары төлөрүтэн, урукку олохпутугар төннөр туһунан толкуйдуур кэммит кэллэ”, — диэтэ.

edersaas.ru

Бу күннэргэ өрөспүүбүлүкэтээҕи суһал ыстаап усулуобуйалары көрөн, куорат, улуус баһылыктарын кытта сүбэлэһэн, Роспотребнадзор сүбэлэрин учуоттаан, быһаарыы таһаарбытын туһунан эттэ.

Дьокуускайга, Жатайга, Аллараа Бэстээххэ, Тиксиигэ, Нерюнгрига, Мииринэйгэ, Ленскэйгэ уонна Покровскайга бэйэни хааччахтаныы эрэсиимэ ыам ыйын 31 күнүгэр диэри уһатыллыбыт. Ол гынан баран, иис тэрилтэлэрэ, химчисткалар, атах таҥаһын оҥорор сыахтар үлэлииллэрэ көҥүллэнэр.

Спордунан дьарыктана тахсыы ыам ыйын 12 күнүттэн көҥүллэниэҕэ. Айсен Сергеевич “Ыарыы тарҕаныыта эрдэ намыраатаҕына, болдьоммут кэм иннинэ чэпчэтиилэр киириэхтэрин сөп”, — диэн эбэн эттэ.

Тыа сиригэр атыы тэрилтэлэрэ, парикмахерскайдар аһыллыахтара. Атыы үлэһиттэрэ маасканы уонна бэрчээккэни кэтэллэрэ булгуччулаах буолар. Бэйэ бэйэттэн тэйиччи буолуу, үлэ сирин дезинфекциялааһын эмиэ хайаан даҕаны тутуһуллуохтаах.

Алдаҥҥа ыам ыйын 12 күнүттэн харантыын уһуллар, ол эрээри, бэйэни хааччахтаныы эрэсиимэ хаалар.

— Бу курдук кыра кыралаан хааччаҕы олоччу төлөрүтүү диэки хамсаан иһиэхпит. Доҕоттор, өйдүөх тустаахпыт, эпидемия туруга төттөрү уустугурдаҕына, бары хааччахтары төннөрөрбүтүгэр күһэллиэхпит. Онон бэйэни харыстаныыны хас биирдиибит өссө кытаанахтыктутуһуох тустаахпыт, — диэн Өрөспүүбүлүкэ Ил Дархана бэлиэтээн эттэ.