Ил Дархан Айсен Николаев уонна Исидор Барахов сиэннэрэ Култуура киинин сыбаайатын түһэрдилэр

Ааптар: 
Бөлөххө киир:

Бүгүн,  бэс ыйын 19 күнүгэр, Үөһээ Бүлүү улууһун Харбалааҕар Исидор Барахов аатынан Култуура киинин бастакы сыбаайата түһэрилиннэ.

Үөрүүлээх тэрээһиҥҥэ Ил Дархан Айсен Николаев уонна И.Барахов сиэннэрэ Андрей Ярославович Барахов, Людмила Ярославовна Раевская, хос сиэнэ Ярослав Барахов кыттан, сыбаайаны үөрүүлээх быһыыга-майгыга түһэрдилэр. Ону тэҥэ, «Сиэрдээх Арассыыйа» баартыйа салайааччыта Сергей Миронов,  Үөһээ Бүлүү улууһун баһылыга Владимир Поскачин, РФ Судаарыстыбаннай Дууматын Федот Тумусов, бырабыыталыстыба чилиэннэрэ, Ил Түмэн дьокутааттара, Харбалаах олохтоохторо кыттыыны ыллылар.

— Саха АССР 100 сылыгар өрөспүүбүлүкэбитин төрүттэспит, автономияны ылар иһин оччотооҕу уустук бэлитиичэскэй балаһыанньаҕа бэйэтин олоҕун да кэрэйбэккэ киирсибит, охсуспут, улахан эппиэтинэһи ылыммыт, саханы саха дэппит улуу киһибитигэр Исидор Никифорович Бараховка аналлаах мусуойунай-култуурунай киини тутуу саҕаламмыта улахан суолталаах. Онон бүгүн биһиги өрөспүүбүлүкэбитигэр улахан историческай суолталаах күн.

Быйылгы Олоҥхо ыһыаҕын өрөспүүбүлүкэ 100 сылыгар анаатыбыт, ол эбэтэр, Исидор Бараховка эмиэ ананар. Кини бэйэтин кэмин улууканнаах уола этэ. Кини охсуһуулаах олоҕун, турууласпыт дьыалатын, киллэрбит сүҥкэн кылаатын умнуо суохтаахпыт. Исидор Барахов дойдутугар кэлэн туран, сиэннэрэ бу кэлэн турдахтарына, кини аатын үйэтитиигэ өссө биир хардыыны оҥорорбутуттан үөрэбин. Эһиил, И.Барахов төрөөбүтэ 125 сылыгар, бу киин тутуллан дьэндэйиэ диэн эрэннэрэбин, — диэн Айсен Николаев этиитин олохтоохтор ытыс тыаһынан уруйдуу көрүстүлэр.

Салгыы Арассыыйаттан ыалдьыт быһыытынан кэлэ сылдьар улахан бэлиитик Сергей Миронов бу курдук эттэ:

— Бэйэтин дьоруойдарын, судаарыстыбаннаһы төрүттэспит дьонун кэриэстиир, ытыктыыр норуот — улуу норуот. Саха норуота ону кэрэһилиирин бүгүн көрөбүт. Арассыыйа саамай улахан эрэгийиэнэ төрүттэммитэ 100 сылын бэлиэтиир, судаарыстыбаннаһын төрүттэспит чулуу дьонун кэриэстиир, үйэтитэр. Биир оннук дьоһун суолталаах тэрээһиҥҥэ кэлэн турарбыттан үөрэбин.

Өрөспүүбүлүкэ аҕа баһылыга биир сыл иһинэн  култуура-мусуой улахан киинин тутуохпут диэн эрэннэрбитигэр саарбахтаабаппын, туолуоҕа. Арассыыйа бары эрэгийиэннэригэр маннык түргэнник тутуу барара буоллар! Бу киин бытарҕан да тымныыга сылаас, сырдык буолуоҕа, дьоҥҥо үтүөнү, үйэлээҕи эрэ тарҕата туруо диэн эрэнэбин, — диэн эттэ.

Салгыы видео-устууну көрүҥ.

Үөһээ Бүлүүттэн Ангелина Васильева, «Саха сирэ» хаһыат.

Хаартыскаҕа Ангелина Васильева уонна Андрей Сорокин түһэриилэрэ.

+1
0
+1
0
+1
0
+1
0
+1
0
+1
0
+1
0