Ил Дархан Айсен Николаев судаарыстыбаннай сүбэһит Михаил Николаевы кытары көрүстэ

Бөлөххө киир:

“Музыка барыбытыгар” бырайыак Арассыыйа атын эрэгийиэннэригэр тарҕаныаҕа. Бу туһунан Саха сирин Бастакы бэрэсидьиэнэ, судаарыстыбаннай сүбэһит Михаил Николаев Ил Дархан Айсен Николаевы кытары көрсөн кэпсэттэ.

Бу бырайыак Михаил Ефимович көҕүлээһининэн Саха сиригэр 2013 сылтан үлэлиир. Кини көрсүһүүгэ бэлиэтээбитинэн, билигин бырайыак сүрүн түһүмэҕэ түмүктэнэн эрэр.

– Бырайыакпыт Саха сиригэр эрэ буолбакка Арассыыйа атын эрэгийиэннэригэр киэҥ биһирэбили ылла. Холобур, Новосибирскай, Пермь, Саратов куораттар консерваториялара бырайыагы федеральнай таһымҥа таһаарыахха баар этэ диэн бэлиэтииллэр. Ил Дархан Айсен Николаев бу этиини эмиэ өйүүр, кини “Азия оҕолоро” бырайыагы оҥорбуппут курдук үөрэнээччилэргэ туһуламмыт Бүтүн Азиятааҕы Дельфийскай оонньуулары кытары тэҥҥэ холбоон ыытарга эттэ, – диэн бэлиэтиир Михаил Ефимович көрсүһүү түмүгүнэн.

Итини таһынан көрсүһүүгэ Михаил Николаев тыа хаһаайыстыбатыгар, чуолаан сылгыны иитиигэ, санааларын эттэ. Кини бэлиэтииринэн, Саха сиригэр сылгыны иитиигэ туох баар усулуобуйа барыта баар. Манна науканы сыһыарар тоҕоостоох. Санатан эттэххэ, билигин бырабыыталыстыба сылгыһыттары, зоотехниктары анаан-минээн бэлэмниир Бүтүн Арассыыйатааҕы научнай-чинчийэр институт филиалын Саха сиригэр аһар туһунан боппуруоһу көрө сылдьар. “Бу хайысханы саҥа таһымҥа таһааран, бэйэбит оҥорон таһаарар бородууксуйабытын элбэтиэ этибит. Онуоха наукаҕа тирэҕирэр сөп”, – диэн бэлиэтиир Михаил Николаев.

Аграфена КУЗЬМИНА

+1
0
+1
0
+1
0
+1
0
+1
0
+1
0
+1
0