Бэлиитикэ Сүрүн

Ил Дархан Айсен Николаев сенатор Егор Борисовы кытары көрүстэ

Арҕааҥҥы дойдулар араас хааччаҕы киллэрбит кэмнэригэр Саха сиригэр сөптөөх дьаһал ылыллан, нэһилиэнньэ олоҕо туруктаах буолуута хааччыллыбыт диэн бэлиэтиир сенатор Егор Борисов СӨ Ил Дарханын Айсен Николаевы кытары көрсүһүүтүгэр.

Көрсүһүүгэ сааскы халаан уутун, навигация, ойуур баһаарын сэрэтии, бохсуу боппуруостарын, ону сэргэ экэниэмикэ туруктаах буолуутун көрдүлэр. Егор Борисов өрөспүүбүлүкэҕэ ылыныллыбыт миэрэлэр сөптөөхтөрүн бэлиэтээтэ. Санатан эттэххэ, бу сыалга өрөспүүбүлүкэ бүддьүөтүттэн 15 миллиард  солкуобайдаах көмө барбыта.

– Арҕааҥҥы дойдулар киллэрбит араас хааччахтарын утары өрөспүүбүлүкэбитигэр сөптөөх дьаһаллар ылыллыбыттар, манна улахан үлэ ыытыллыбыт диэн көрөбүн. Үп-харчы да өттүнэн, материальнай ресурсалары, тэрилтэлэри да түмүү өттүгэр. Итини таһынан билигин илиҥҥи дойдулары кытары үлэлэһии түмүгэр тас дойдуттан киирэр табаардары, ол иһигэр саппаас чаастары, аҕалыы боппуруоһа көрүллэ сылдьар. Бу үлэлэр барыта Ил Дархан Айсен Сергеевич федеральнай киини кытары сөптөөх үлэни ыыппытын түмүгэ, – диэн бэлиэтиир көрсүһүү кэнниттэн Егор Афанасьевич.

Ил Дархан уонна сенатор тыа хаһаайыстыбатын боппуруостарын туспа тутан ырыттылар. Егор Борисов бэлиэтииринэн, улахан хаһаайыстыбалары уонна чааһынай кэтэх хаһаайыстыбалаахтары тэҥҥэ тутан, үбүлээһини ыытар сөп. “Үүтү туттарыыга киирбит уларыйыылар, мин санаабар, сөптөөх дьаһал. Үбүлээһини көрөр ньыма сылын аайы тупсарыллан иһиэхтээх. Бу тыа сирин олохтоохторугар улахан көмө”, – диэн бэлиэтиир кини.

Аграфена КУЗЬМИНА

 

0
0
Telegram @edersaas20