Саха Өрөспүүбүлүкэтин Ил Дархана Айсен Николаев бу күннэргэ Москва куоракка үлэтинэн сылдьар. Кини РФ Бэрэсидьиэнэ Владимир Путин Анал этиитигэр кытынна.
Саха сиригэр ситиһиилээхтик үлэлиир бырайыактар тустарынан «Россия 24» телеханаал кэрэспэдьиэнэ бэлиэтээн туран, хаарбах уонна саахалланар туруктаах дьиэттэн дьону көһөрүүгэ Саха сирэ инники күөҥҥэ сылдьарын эттэ уонна Ил Дархантан бу туһунан сырдатарыгар көрдөстө.
— Бу бырагыраама чэрчитинэн, мөлүйүөнтэн тахса кв.м. иэннээх олорор дьиэттэн көһөрүү үлэтэ ыытыллыа. Биһиги кыраапыгы тутуһан иһэбит. Өскөтүн урут бырагыраама урут улахан куораттарга эрэ үлэлээбит буоллаҕына, бүгүн бу үлэ Саха сирин барытын хабар. Арктикаттан саҕалаан Саха сирин соҕуруу өртүгэр барытыгар тиийэ.
Уһук Илин эрэгийиэҥҥэ 2 бырыһыаннаах ипотеката олоххо киирбитэ олоҕу-дьаһаҕы тупсарарга улаханнык көмөлөһөр. Биллэн турар, чэпчэтиилээх кирэдьиит быраграамата аччыгый куораттарга, тыа сирдэрин нэһилиэнньэлээх пууннарыгар эмиэ тарҕаныа. Онон чугастааҕы кэмнэргэ дьиэни-уоту тутуу үлэтэ хас эмэ төгүл улаатыаҕа.
Итинтэн сиэттэрэн дьиэни-уоту тутууга сорох эрэгийиэннэр муҥатыйалларын, Саха сиригэр бу боппуруос хайдаҕын туһунан ыйытыыга, Ил Дархан: — Саха сиригэр олохтоох тутуу хампаанньата куруук баар. Бэл, уустук сылларга баара. Билигин тутуу үлэтигэр улахан бырыһыанын кэлии дьон ылаллар. Коронавирус былырыыҥҥыттан саҕаланыаҕыттан, ханныгын да иһин, тутуу үлэтигэр олохтоох каадырдар баар буоланнар уонна дьону профтехүөрэхтээһининэн түргэнник уонна көдьүүстээхтик үөрэтэн, туруоруллубут соругу ситиспиппит. Итиэннэ национальнай бырайыагынан социальнай эбийиэктэри тутууга, саахалланар туруктаах хаарбах дьиэттэн дьону көһөрүүгэ хаалыы суох.
Өлүөнэ эбэни туоруур муоста туһунан сэҥээриигэ Айсен Сергеевич: — Бу бырайыагы олоххо киллэрэргэ бэлэммит. Марат Хуснуллины кытары бу боппуруоһунан хаста да көрүстүбүт. Бэҕэһээ эрэ эмиэ көрсөн кэпсэттибит, Бырабыыталыстыба хамыыһыйата ыытылынна. Билигин салалта быһаарыыта эрэ хаалла. Дойдубут Бэрэсидьиэнэ өйүүр бырайыага чугастааҕы сылларга олоххо киирэригэр эрэнэбин. 2024 сыл бүтүүтүгэр Өлүөнэ эбэни туоруур муоста тутуллуо.
Хаартыска: ЯСИАттан ылылынна