Сүрүн Үөрэх уонна наука

Ил Дархан Айсен Николаев Саха политехническай лиссиэйгэ Билии күнүгэр сырытта

Бүгүн, балаҕан ыйын 1 күнүгэр, Ил Дархан Айсен Николаев Дьокуускай куорат Саха политехническай лиссиэйигэр Билии күнүнээҕи үөрүүлээх линиэйкэҕэ сырытта. Үөрэх дьылын иннинэ бу оскуолаҕа хапытаалынай өрөмүөн оҥоһуллубута.

«Лиссиэй, Дьокуускай куорат өссө уон оскуолатын курдук, саҥа үөрэх дьылын хапытаалынайдык өрөмүөннэнэн көрүстэ. Үөрэнээччилэргэ уонна кэлэктиипкэ бастыҥ бэлэҕинэн буолла. Мин бу оскуолаҕа 2013 сыллаахха Дьокуускай баһылыгынан үлэлии сылдьаммын линиэйкэҕэ кыттыбытым. Оччолорго 14-с оскуола Саха политехническай лиссиэй аатын ылбыта. Саҥа статус оскуола кэлэктиибигэр улахан ситиһиинэн эрэ буолбакка, манна эбии улахан эппиэтинэһи сүктэрбитэ. Онтон ыла бары бииргэ — үөрэнээччилэр, учууталлар, төрөппүттэр — лиссиэй саҥа устуоруйатын суруйа сылдьаҕыт», — диэн Айсен Николаев Телеграм-ханаалыгар суруйда.

Лиссиэйгэ Билии күнүнээҕи линиэйкэ Арассыыйа уонна Саха сирин былааҕын өрө көтөҕүүттэн, өрөгөй ырыатын толорууттан саҕаланна.

Андрей Сорокин хаартыскалара.

0
0
Telegram Whatsapp