Ил Дархан Айсен Николаев РФ Тырааныспарын миниистирин кытта мунньахтаата
От ыйын 21 күнүгэр видеоконференцсибээһинэн СӨ Ил Дархана Айсен Николаев РФ Тырааныспарын миниистирин Виталий Савельевы кытта мунньахтаата. Манна өрөспүүбүлүкэттэн таас чоҕу тиэйии, чэпчэтиилээх авиабилиэт, Өлүөнэ муостатын тула кэпсэттилэр.
Айсен Сергеевич миниистиргэ Өлүөнэ муостатын тутууга бүгүҥҥү күҥҥэ туох үлэ барарын кэпсээтэ: суол оҥоһуллар, баахтабай бөһүөлэктэр учаастактарын бэлэмнииллэр. Миниистир иһитиннэрбитинэн, тустаах министиэристибэ 2022-2024 сылларга федеральнай бүддьүөттэн муостаны тутууга үп көрүллэригэр үлэлэһэр. Маны таһынан, сорох үп 2021 сылга тыырылларыгар эмиэ үлэ барар эбит.
Саха сириттэн таас чоҕу тиэйиигэ таһаҕаһы тиэйэр баазаны чопчулааһын үлэтэ барарын Виталий Савельев ыйда.
Салгыы Айсен Николаев нэһилиэнньэни ыарахан сыаналаах авиабилиэт долгутарын эттэ уонна сааһыттан хааччаҕа суох Уһук Илин гражданнара чэпчэтиини туһанар буолбуттарыгар миниистиргэ махтанна. Итиэннэ Дьокуускайтан көтөргө бу чэпчэтии суоҕун туһунан бэлиэтээн эттэ. Онон сибээстээн, салайааччылар РФ Бырабыыталыстыбатын резервнэй пуондатыттан эбии харчы көрүллэн, 2021 сыл балаҕан ыйын 1 күнүттэн сэтинньи 30 күнүгэр диэри Дьокуускай — Санкт-Петербург, Мииринэй — Санкт-Петербург хайысхаларынан чэпчэки сыанаҕа көтөр кыах баар буолуон сөбүн туһунан ырыттылар.
СӨ Ил Дарханын уонна Бырабыыталыстыбатын дьаһалтатын пресс-сулууспата.
Андрей Сорокин хаартыскаҕа түһэриитэ.