Ил Дархан Айсен Николаев РФ Бэрэсидьиэнэ Владимир Путин сүбэ мунньаҕар кытынна
Дойду Аҕа баһылыга Владимир Путин видеоконференция киэбинэн ыыппыт сүбэ мунньаҕар эрэгийиэн баһылыктара кытыннылар. Айсен Николаев Путиҥҥа ойуур баһаардарын умуруорууга этиилэрин киллэрдэ.
Саха Өрөспүүбүлүкэтигэр баһаар сезонугар бэлэмнэнии үлэтин туһунан Ил Дархан Айсен Николаев дакылааттаата:
— Владимир Владимирович, эһиги сорудаххытынан баһаартан ойууру харыстааһыҥҥа 2022 сылга бүддьүөттэн үбүлээһин биэс төгүл улааппыта. Федеральнай бүддьүөттэн уопсайа тустаах сыалга 1 млрд 600 мөл. солк. тахса көрүлүннэ. Өрөспүүбүлүкэ эмиэ үбүлээһин кээмэйин лаппа улаатыннарбыта. Ол чэрчитинэн саҥа авиаотделениелар тэрилиннилэр. Быйыл үлэһиттэрбит уонна техникаларбыт эбиллэн, ойуур баһаардарын умуруорууга күүһүрдүбүт. Өрөспүүбүлүкэ бары улуустарыгар ойуур баһаарын утары үлэлиир штаты таһынан бөлөхтөр тэрилиннилэр. Уопсайа 285 киһилээх бөлөх. Маны таһынан мин быһаарыыбынан Быыһыыр сулууспа үлэһитин ахсаана 45 киһинэн элбээтэ. Ахсынньыга эбии 69 техника атыылаһылынна.Ааспыт сайын ойуур баһаардара күүскэ турбуттарыгар, ардаҕы ыҥырар анал ньыманы туһаныы улахан көдьүүстээҕин итэҕэппитэ. Ол курдук ойуур баһаардарын умуруорууга Авиалесоохрана «Веер» диэн оборудованиелаах көтөр аала улаханнык көмөлөспүтэ. Маннык көтөр ааллар дойду үрдүнэн тарбахха баттанар ахсааннаахтар. Билигин эрэгийиэннээҕи авиахампаанньа базатыгар Ан-26 сөмөлүөккэ искусственнай ардаҕы аҕалар установканы туруорууга үлэ ыытыллар. Маны таһынан РФ Ойуур кодексыгар уларытыылар киириэхтэрин наада. Ол курдук искусственнай ардаҕы аҥаардас ойуур баһаардарын умулларыыга эрэ буолбакка, хонтуруолга сылдьар ойуурга баһаар тахсар кутталын кыччатарга эмиэ туһаныахха наада. Онон Саха сирин пилотнай регион быһыытынан көрөргүтүгэр этии киллэрэбин.
“Ойуур баһаарын умуруорууга “Север” киин икки бөртөлүөтэ үлэтин саҕалыаҕа. Ыам ыйыгар биир көтөр аалы Саха сиригэр ыытыахпыт”, – диэн РФ айылҕатын ресурсаларын уонна экологиятын миниистирэ Александр Козлов сүбэ мунньах кэмигэр эттэ.
edersaas.ru