Айсен Николаев Ньурбаҕа социальнай эбийиэктэр тутуллууларын хаамыытын бэрэбиэркэлээтэ.
Маны сэргэ, Ил Дархан норуот айымньытын дьиэтигэр Ньурбатааҕы көһө сылдьар драматическай тыйаатыр тутуллуутун көрдө. Генеральнай бэдэрээччит «Сахастройбетон» ХЭУо бэлиэтээбитинэн, тутуу 40 % бэлэм. Дьиэ акылаата толору ситэн-хотон турар. Эбийиэги 2021 сыл бүтүүтүгэр үлэҕэ киллэрэр былааннаахтар.
Ил Дархан САССР 100 сылын, бэлиэ даатаны көрсө, тыйаатыр үлэҕэ биир бастакынан киириэҕин эттэ. Маныаха таһынааҕы сирэ-уота эмиэ оҥоһуллар. Сорудаҕы Ил Дархан тутууну көрөн-истэн баран биэрдэ.
Айсен Николаев маны таһынан, чэпчэки атлетиканан дьарыктанарга манежтаах 3000 миэстэлээх стадиону тутуу боппуруоһун көрдө. Бу тутуу 2012 сыллаахха саҕаламмыта уонна 2014 сыллаахха тохтообута. 2018 сыллаахха от ыйыгар эбийиэк бырайыактыыр-сметнай документациятын көннөрүүгэ аһаҕас куонкурус биллэриллибитэ. Куонкурус түмүгүнэн муниципальнай хантараакка «Якутагропромпроект» АУо кытта илии баттаммыта. Билигин бырайыак судаарыстыбаннай эспэртиисэ түмүгүн күүтэр.
Стадион бырайыагынан 3000 миэстэлээх, ону сэргэ, оттуллар чэпчэки атлетика манеһа, сүүрэр дорожкалар, сахалыы атах оонньууларыгар, уһуну ыстанарга сектордар, 104х69 м оонньуур хонуулаах футболлуур сир, мас тардыһарга хомуллар киин үрдэл, хапсаҕайга уонна көҥүл тустууга үс көбүөр көрүллүбүттэр.
Мария Васильева (СИА) хаартыскаҕа түһэриитэ