Уопсастыба

Ил Дархан Айсен Николаев Нерюнгри оройуонун биэс сыллаах былаанын билистэ

Нерюнгри оройуонун биэс сыллаах былаанын Ил Дархан билистэ.

2025 cылга Нерюнгри оройуонун 50 сыллаах үбүлүөйэ, оттон эһиилигэр Чульман уонна Иенгра бөһүөлэктэрэ 100 сыллаах үбүлүөйдэрэ күүтүллэр. Үбүлүөйдээх сылы хайдах бэлиэтиир туһунан былааны оройуон баһылыга Роман Щегольняк Ил Дархан Айсен Николаевка билиһиннэрдэ.
Былаан сүрүн тиэмэтинэн оройуон сайдыытын социальнай-экэнэмиичэскэй боппуруостара буоллулар. Ол курдук инфраструктура сайдыыта, ол иһигэр суол өрөмүөнэ эмиэ киирдэ. Щегольняк этэринэн, суолу барытын өрөмүөннүүргэ 1 миллиард 900 мөлүйүөн солкуобай наада. Инфраструктура сайдыытыгар куорат уутун ханаалын реконструкциялааһын эмиэ киирэр. Ол курдук, үлэ бастакы түһүмэҕэ ааспыт сыл ахсынньытыгар ыытыллыбыта. Ыраас уу носуоһун ыстаансыйатын тутуу, уу хачайданар систиэмэтин саҥардыы үлэтэ ыытыллыбыта. Ити үлэҕэ 400 мөлүйүөн солкуобай көрүллүбүтэ. Иккис түһүмэххэ ууну ыытар систиэмэни саҥардары былаанныыллар. Бу систиэмэ канализационнай 16 носуос ыстаансыйалаах.
Социальнай хайысхалаах эбийиэктэр туһунан этэр буоллахха, Роман Щегольняк Чульман бөһүөлэгэр 9 №-дээх оскуола тутуутун бэлиэтээтэ. Билиҥҥи туругунан оскуола хаарбах туруктаах. Ону сэргэ, бу бөһүөлэккэ култуура дьиэтин тутуутун уонна Иенгра бөһүөлэгэр баһаарынай депо дьиэтин, Нерюнгритээҕи техническэй институт уопсай дьиэтин уонна Золотинкаҕа ыраастыыр тутууну тутуу туһунан этии көтөхтө. Бу этиллибиттэн сороҕо судаарыстыбаннай бырагыраамма чэрчитинэн олоххо киириэҕэ. Ол курдук, олбуор таһынааҕы сир-уот федеральнай бырайыак чэрчитинэн олоххо киирэр. Оттон доруобуйа харыстабылын сайдыытыгар өрөспүүбүлүкэ доруобуйаҕа харыстабылын министиэристибэтинэн туспа 2019-2024 сылларга диэри стратегия оҥоһуллубут. Ааспыт сыл Нерюнгригэ оҕо поликлиникатыгар номнуо хапытаалынай өрөмүөн ыытыллыбыт. Бу сылга дьахталларга аналлаах сүбэлиир-амалыыр «Б» куорпус дьиэтэ уонна тирии уонна венерологическэй диспансер дьиэтэ өрөмүөннэниэхтээх. 2020-2023 сылларга «А» куорпуска улахан дьоҥҥо аналлаах поликлиника өрөмүөннэнэрэ күүтүллэр. Онтон салгыы ньиэрбэ ыарыһахтар эмтэнэр диспансердара уонна пищеблоктара өрөмүөннэнэрэ былааннанар.
Оройуоҥҥа санитарнай-эпидемиологическэй балаһыанньаны кэпсэттилэр. Ил Дархан Айсен Николаев коронавирус дьаҥын балаһыанньатыттан долгуйарын иһитиннэрдэ. Кини уоппускаттан кэлээччилэри хонтуруоллуур эбии миэрэлэр ылыллалларыгар сорудахтаата, ону сэргэ вакцинаны ылыыны тэтимнииргэ дьаһал биэрдэ. Бүгүҥҥү күҥҥэ нэһилиэнньэҕэ улахан дьон ахсааныгар 70% былааҥҥа оройуон үрдүнэн нэһилиэнньэ 54% эрэ вакциналаммыт.

Ульяна ЗАХАРОВА.

1
0