Айылҕа харыстабыла Нацбырайыактар Сүрүн

Ил Дархан Айсен Николаев маһы олордууга кытынна

Бу күннэргэ бүтүн Арассыыйатааҕы «Ойууру харыстыыбыт» диэн маһы олордууга аахсыйа буола турар. Ол чэрчитинэн, СӨ Экологияҕа министиэристибэтин тэрийиитинэн, бүгүн Бүлүү федеральнай суолун 44-с км Ил Дархан Айсен Николаев кыттыылаах 10 000 кырачаан бэһи олордуу тэрээһиннээхтик ыытылынна.

Бэстэри Хабаровскайдааҕы питомниктан аҕалбыттар. Бу иннинээҕи тэрээһин бу бэнидиэнньиккэ Горнай улууһун Күөрэлээҕин аттыгар Горнайдааҕы лесничество көҕүлээһининэн ыытыллан, 2000 кырачаан бэс олордуллубута.

Күөх дуолу араҥаччылыыр тэрээһиҥҥэ Айсен Николаев: «Бүгүҥҥү үтүө күнүнэн барыгытын эҕэрдэлиибин. «Ойууру харыстыыбыт» диэн Арассыыйа таһымнаах аахсыйа Саха сириттэн саҕаламмыта махталлаах дьыала. Ол курдук Нерюнгри оройуонуттан саҕаламмыта, салгыы эстафетаны Горнай улууһа туппута. Бүгүн бу Дьокуускай куоракка аахсыйа буола турар. Бүлүү суолун тутууга туһаныллыбыт карьер оннугар бэһи олордор үтүө тэрээһиҥҥэ кытта кэлбиккит махталлаах дьыала. Быйыл элбэх ойуур баһаардаах сайыҥҥа маннык хабааннаах тэрээһиннэр ыытыллаллара олус көдьүүстээхтэр», — диэн эҕэрдэ тылы эттэ.

Бу тэрээһин чэрчитинэн, өрөспүүүбүлүкэ үрдүнэн 25 тыһыынча кэриҥэ мас олордулунна. Бүгүҥҥү тэрээһиҥҥэ уопсастыбаннас, тустаах министиэристибэ исписэлиистэрэ, Дьокуускайдааҕы үөрэх кыһаларын устудьуоннара көхтөөхтүк кытыннылар.

Александр Тарасов, edersaas.ru

0
0