Ил Дархан Айсен Николаев кикбоксердары Арассыыйа чөмпүйэнээтигэр ситиһиилэринэн эҕэрдэлээтэ
“Петр Васильевы уонна Тимофей Сивцевы үрдүк кыайыыгытынан уонна кикбоксиҥҥа Арассыыйа чөмпүйүөнүн аатын сүкпүккүтүнэн эҕэрдэлиибин!
Чөмпүйэнээккэ Денис Андреев үрүҥ көмүс мэтээли, Иван Захаров, Айаал Местников, Михаил Иванов, Христина Васильева уонна Айталина Оконешникова боруонса мэтээллэри ыллылар! Маладьыастар! Барыгытыгар кытаанах доруобуйаны, кынаттаах кыайыылары, ситиһиилэри уонна кыайыы пъедесталын үктэлин барытын баһылыыргытыгар баҕарабын!
Арассыыйа чөмпүйэнээтигэр уонна “К-1” көрүҥҥэ Арассыыйаҕа бастыыр иһин күрэхтэһиигэ кыттыбыт спортсменнарга бука барыгытыгар махтанабын. Күрэхтэһии үрдүк таһымҥа ааспытынан тэрийээччилэргэ махталбын тиэрдэбин. Арассыыйа уонна аан дойду таһымнаах спортивнай тэрээһиннэр биһиги өрөспүүбүлүкэбитигэр өссө даҕаны ыытыллыахтара диэн бигэ эрэнэбин”, — диэн Ил Дархан Айсен Николаев «Инстаграмҥа» бэйэтин эҕэрдэтин тириэртэ уонна махталын биллэрдэ.