Бүгүн Ил Дархан Айсен Николаев ойуур баһаарын бохсор суһал ыстаап мунньаҕын Горнай улууһугар ыытта. Бу туһунан кини бэйэтин инстаграмыгар суруйда:
«Баһаары кытта охсуһааччылар тэрээһиннээх үлэлэрин түмүгэр Маҕарас нэһилиэгин аттыгар балаһыанньа көнөн эрэр.
Атамай нэһилиэгин Ойбон Күөл учаастагар нэһилиэк төрүт олохтооҕо Иван Петрович Федоровы көрсөн кэпсэттим. Кини дьону кытта баһаары умулларыыга үлэлэһэ сылдьар.
Эдэр инструктор Егор Захаров салайар Авиалесоохрана тэрилтэтин Бэрдьигэстээхтээҕи салаатын байыастара бары кыахтарын ууран туран, кыһыл уоту кытта охсуһаллар.
Балаһыанньаны сотору-сотору күүһүрэн кэлэр тыал хайысхата уустугурдар. Бөдөҥ баһаардар наар нэһилиэк диэки хайысханы тутуһаллар. Онон күүстээх ойуур баһаарын утары эбии кэлэн иһэр күүһү туһанабыт.
Бу маннык тыҥааһыннаах кэмҥэ өрөспүүбүлүкэ тэрилтэлэриттэн, министиэристибэлэриттэн көмө, өйөбүл буолан, баһаары бохсууга сүҥкэн кылааттарын киллэрэллэр. Бүгүн горнайдар 100-тэн тахса спортсмен көмөҕө иһэрин үөрэ иһиттилэр. Махтал кинилэргэ!«.
Кырдьыга даҕаны, айылҕа иэдээнэ туохха да тэҥнэммэт улахан алдьархай буоллаҕа. Бу маннык ыксаллаах кэмҥэ Ил Дархан Айсен Николаев бэйэтинэн тиийэн, Горнай улууһун олохтоохторун кыһалҕаларын үллэстэрэ, миэстэтигэр сылдьан олус наадалаах быһаарыылары ылынара — бары салайааччыларга холобур.
Елена ПОТОЦКАЯ, «Саха сирэ» хаһыат, edersaas.ru
Хаартыска — Ил Дархан Айсен Николаев инстаграмыттан.