Бэлиитикэ

Ил Дархан Айсен Николаев: «Күргүөм иммунизация барыбытыгар барыстаах!»

Бүгүн Саха сирин Ил Дархана Айсен Николаев РБК теле-ханаалга быһа биэриигэ видео-сибээс нөҥүө коронавируһу утары вакцина быһыы туһунан санаатын үллэһиннэ.

— Биллэн турар биһиги бары бэркэ диэн өйдүүбүт – күргүөм иммунизациялааһын эрэ көмөтүнэн ковиды тохтотор кыахтаахпыт. Биһиги өрөспүүбүлүкэбитигэр ити суолу тутуһабыт. Хомойуох иһин, бу тула мөккүөр уҕараабат, кириитикэлээччилэр бааллар, ылбыт миэрэлэрбитин атыннык этэн таһаараллар. Холобур, биһиги Саха сиригэр вакцинацияны күүһүнэн киллэрэр санаабыт суох, ол көҥүллэммэт даҕаны, сатаммат даҕаны. Ону кытта үлэлии турар сокуоннарга олоҕуран ыам ыйын 19 күнүттэн Өрөспүүбүлүкэ сүрүн санитарнай бырааһа күргүөм вакциналааһын туһунан дьаһал таһаарбыта. Бу дьаһалы толорорго хас даҕаны араҥа үлэһиттэр булгуччу вакциналаныахтаахтарын туһунан быһаардыбыт. Ити доруобуйа харыстабылын, үөрэҕирии, социальнай эйгэ, судаарыстыбыннай былаас үлэһиттэрэ, тырааныспар, энергетика эйгэтигэр үлэлиир дьон, өҥө оҥоруу эйгэтин үлэһиттэрэ, байыаннайдар, сокуону араҥаччылааччылар, устудьуоннар – бүгүн дьону кытта чугастык алтыһар дьон. Уонна биллэн турар 60 саастарын ааспыт уонна хроническай ыарыылаах гражданнар.

Биэриини ыытааччы “вакциналанарга көҕүлээһин ньымаларыгар хайдах сыһыаннаһаҕытый?” диэн ыйыппытыгар Айсен Сергеевич маннык хоруйдаата:

– Биллэн турар, араас тэрилтэлэр көҕүлүүр кыахтара туспа буолар. Холобур “АЛРОСА” тэрилтэ соторутааҕыта бэйэтин үлэһиттэрин иһигэр массыына сүүйүүлээх вакциналааһын аахсыйатын ыыппыта. Биһиги вакциналаммыт судаарыстыбыннай үлэһиттэргэ икки өрөбүл күн биэрэр туһунан быһаарыы ыллыбыт. ХИФУ устудьуоннарыгар профком салаатынан эмиэ чэпчэтиилэр, төлөбүрдэр баар буолуохтара. Маасабай иммунизацияны ситиһии барыбытыгар барыстаах, ким туох кыахтааҕынан күргүөм вакциналааһыны өйүөхтээх.

Бүгүн урбаанньыт күнэ, онон мин кинилэри үөрүүнү кытта эҕэрдэлиибин. Бу сыл кинилэргэ олус уустук этэ, ордук дьоҕус урбаан үлэһиттэрэ эмсэҕэлээтилэр. Көҥүл атыы-эргиэн сөргүтүүтэ кинилэргэ саамай күндү бэлэх буолуо этэ.

«Саха сирэ» хаһыат, edersaas.ru

Хаартыска Ютуб биэрииттэн

0
0