Алтынньы 2 күнүгэр Ил Дархан Айсен Николаев “Арассыыйатааҕы энергетическэй нэдиэлэ” норуоттар икки ардыларынааҕы III форумҥа кыттыыны ылла.
edersaas.ru
Бу суолталаах тэрээһиҥҥэ РФ Бэрэсидьиэнэ Владимир Путин кытынна. Судаарыстыба баһылыга быйыл форумҥа хаһааҥҥытааҕар да элбэх – 80 дойду 200 бөдөҥ хампаанньатыттан 10,5 тыһ. киһи кыттыбытын бэлиэтээтэ.
Владимир Путин эспиэрдэр этиилэринэн, энергияны туттуу Азия уонна Тиихэй океан дойдуларыгар, ону тэҥэ Европа ырыынагар кэлэр сылларга үрдүү туруоҕун иһитиннэрдэ.
— Арассыыйа убаҕас оттукка Кытайга номнуо бөдөҥ эспиэринэн буолла. Ол эбэтэр, кэлиҥҥи 10 сылга убаҕас оттугу бу дойдуга батарыы 4,5 төгүл улаатта. Сыл бүтэһигэр “Сибиир күүһэ» гаас утаҕын үлэҕэ киллэриэхпит. Бу Кытайга батарыллар Арассыыйа гааһын илиҥҥи хайысхатын чааһынан буолар, — диэн эттэ судаарыстыба баһылыга.
Айсен Николаев пленарнай мунньах түмүгэр тэрээһин кыттыылаахтара энергоресурс ырыынагар углеводородтартан саҕалаан энергия кэскиллээх хайысхаларыгар тиийэ суолталаах боппуруостар көрүллүбүттэрин бэлиэтээтэ. Чох промышленноһа тэтимнээхтик сайдыбытынан сибээстээн, ураты болҕомто экологияны харыстааһыҥҥа, тулалыыр эйгэҕэ хоромньуну намтатарга уурулунна. Ил Дархан этиитинэн, Арассыыйа Норуоттар икки ардыларынааҕы форумнары ыытан, дойду аан дойдутааҕы энергоресурса ырыынагар сүрүн оруоллааҕын көрдөрбүт.
— Биллэн турар, форум пленарнай мунньаҕар көрүллүбүт боппуруостар өрөспүүбүлүкэ сайдыытыгар улахан суолталаахтар. Саха сирэ чох хостооһунун дойдуларыгар бастыҥнар ахсааннарыгар сылдьар. Кэнэҕэс гаас салаатыгар инники күөҥҥэ сылдьар эрэгийиэнинэн буоларбыт саарбахтаммат. РФ Бэрэсидьиэнэ Владимир Путин “Сибиир күүһэ» гаас утаҕын тутууга уонна инники сайдыытыгар туһуламмыт боппуруостары форум кыттыылаахтарын иннигэр туруоран, ону дьүүллэһии буолла. Биллэн турар, бу Саха сирин сайдыытыгар саҥа саҕахтары арыйар, өрөспүүбүлүкэ бүддьүөтүн дохуоттаах чааһын үрдэтэр, транспортнай, энергетическэй, социальнай инфраструктураны сайыннарар, эрэгийиэн олохтоохторугар тыһыынчанан үрдүк хамнастаах үлэ миэстэтин арыйар, – диэн Ил Дархан Айсен Николаев тоһоҕолоон бэлиэтээтэ. Бу туһунан СӨ Аҕа баһылыгын уонна бырабыыталыстыбатын пресс-сулууспата иһитиннэрэр.
Елена ПОТОЦКАЯ, “Саха сирэ” хаһыат, edersaas.ru
Хаартыска: СИА