Ытыктабыллаах сылгыһыттар, учуонайдар, бу салааҕа үлэлээбит бэтэрээннэр!
Саха Өрөспүүбүлүкэтин салалтатын уонна тус бэйэм ааппыттан эһигини Сылгыһыт күнүнэн итиитик-истиҥник эҕэрдэлиибин!
Сылгыны иитии, көрүү-истии бу саха норуотун өбүгэлэриттэн утумнаан илдьэ кэлбит ураты үгэһэ уонна киэн туттуута. Сылгыны иитиигэ саха норуотугар элбэх сиэр-туом баар. Олоҥхоҕо ат бухатыыры кытта тэҥ уобарастаах.
Саха сирэ Уһук Илиҥҥи уокуругар сыспай сиэллээҕин ахсаана элбэҕинэн баһыйарын таһынан, РФ үгүс эрэгийиэннэрин куоһарар. Ол курдук, дойдубут сылгыларыттан 14 %-на биһиэхэ баар. Билиҥҥи туругунан өрөспүүбүлүкэбитигэр барыта 182 тыһ. сылгы баара биллэр.
Саха сирин салалтата өрөспүүбүлүкэҕэ сылгыны иитиигэ улахан болҕомтону уурар. 2017-2019 сылларга Саха сирин сылгыһыттарыгар 250 сылгы баазатын тутталларыгар субсидия көрүллүбүтэ, биир баазаны тутууга 1 мөл. солк тиксибитэ. Ааспыт сылга сылгыны итиини сайыннарыыга өрөспүүбүлүкэ бүддьүөтүттэн 427 мөл солк. тыырыллыбыта.
Саха сиригэр сылгыһыттар идэлэрин үрдэтэр, үөрэтэр аналлаах икки киин тэриллибитэ. Киин эргимтэҕэ үөрэтэр анал киин Хаҥалас улууһун «Бөртө» сылгы иитэр собуот баазатыгар уонна хоту улуустарга аналлаах Өймөкөөн улууһугар «Тонор» кэпэрэтиипкэ тэриллибиттэрэ. Бу кииннэргэ уопсайа 216 киһи үөрэнэн, билигин сылгы иитиитигэр күүскэ ылсан үлэлии-хамсыы сылдьаллар.
Быйылгы тустаах тэрээһин Ньурбаҕа ыытылла турар. Ол чэрчитинэн, ат сүүрдүүтэ, племенной сылгыларга аналлаах быыстапкалар буолуохтара. Сүрүн тэрээһининэн Ньурба улууһугар Чаппандаҕа үөрэтэр киин аһыллыаҕа уонна 18 хаһаайыстыбаҕа сылгы баазатын туталларыгар үстүү мөл. солк. тыырыллыаҕа.
Өссө төгүл барыгытын идэлээх бырааһынньыккытынан эҕэрдэлиибин! Тыа хаһаайыстыбата биир улахан оруолу ылар, олортон биир сүрүннэринэн сылгыны иитэр салаа буолар.
Идэлээх бырааһынньыккытынан барыгытын эҕэрдэлиибин, кытаанах доруобуйаны, үлэҕит-хамнаскыт этэҥҥэ салаллан иһэригэр, саҥа саҕалааһыннаргыт табыллан иһэллэригэр, дьиэ кэргэҥҥитигэр бары үчүгэйи, үтүөнү баҕарабын!